Pasuri që vlerësohen 4.5 milionë euro i janë konfiskuar Gëzim Sallakut nga autoritetet italiane. Siç bëjnë me dije mediat italiane, vendimi për konfiskimin është marrë nga gjykata e Breshias dhe është ekzekutuar nga “Guardia Di Finanzia”.
Asetet që i kalojnë shtetit italian përfshijnë një vilë, aksione në sektorët e hoteleve luksoze, ndërtimit dhe pasurive të paluajtshme.
Sipas autoriteteve italiane, konfiskimi u urdhërua si rezultat i hetimeve të një natyre ekonomike, të cilat zbuluan një disproporcion të dukshëm midis standardit të jetesës së Sallakut dhe familjarëve të tij dhe të ardhurave të deklaruara prej tij pranë organeve tatimore.
Po sipas mediave italiane, ndaj Sallakut është vendosur nga gjykata masa e sigurimit personal të ndalimit të ndryshimit të vendbanimit për pesë vite.
Në shtetin italian, Gëzim Sallaku ka qenë nën hetim dhe i dënuar për çështje të ndryshme.
Nga viti 2002 deri më sot, ai ka qënë i akuzuar si i përfshirë në mashtrime në lidhje me shitjen e makinave të vjedhura dhe marrjen e makinerive të vjedhura në përdorim, por jo vetëm. Ka gjithashtu hetime për mashtrim dhe evazion fiskal, falimentim të rremë dhe posedim të armëve të zjarrit. Gëzim Sallaku së bashku me 4 vëllezërit është arrestuar në 2018 për shitje dhe trafikim të lëndëve narkotike. Ata u vunë në pranga gjatë një operacioni anti-drogë që u finalizua me arrestimin e 22 personave.
Edhe në Shqipëri, Prokuroria e Durrësit i ka sekuestruar Sallakut disa prona që ai kishte ngritur në vendin tonë, ku përfshihen apartamente, toka dhe dy objekte 2 dhe 3-katëshe, në kuadër të një procedimi penal ku Sallaku bashkë me dy persona të tjerë akuzohen për pastrim parash.
