Një zjarr i fuqishëm ka shpërthyer rreth orës 15:40 të kësaj të premteje në qytetin e Ballshit, tek ish Uzina e përpunimit të naftës.
Një ish-depozitë e naftës bruto e kapacitetit 10 mije metër kub, është përfshirë nga flakët. Depozita ka qenë e repartit të transportit të naftës në ish KPTHN në Ballsh.
Dyshohet se një grup pune që po kryenin shkatërrimin e depozitave për skrap, duke prerë me troko dhe oksigjen, kanë rënë në kontakt me mbetje të gazrave të naftës bruto, e cila ka shpërthyer më pas në flakë.
Nga shpërthimi nuk raportohet për viktima apo persona të lënduar. Por flakët janë përhapur me shpejtësi dhe kanë përfshirë pyllin me pisha në zonë.
Pamjet teksa zjarrfikësit po shuanin flakët i ka shpërndarë edhe vetë ministri i Brendshëm Taulant Balla përmes një postimi në rrjete sociale.
“Shërbimet zjarrfikëse po punojnë për fikjen e një zjarri në disa ish-depozita lëndë djegëse dhe vendosjen e flakëve nën kontroll”, shkruan ministri.
Rreth tre orë pas ngjarjes, policia konfirmoi shuarjen e flakëve.
Burime zyrtare nga blutë kanë proceduar penalisht dy persona për rastin.
“Nga specialistët e Komisariatit të Policisë Mallakastër, u referuan materialet në Prokurori për shtetasit A. O., 49 vjeç, banues në Korçë, dhe B. R., 56 vjeç, banues në Mallakastër, pasi duke punuar për çmontimin e depozitës, nga pakujdesia kanë shkaktuar zjarr dhe si pasojë është shkaktuar ndotje e ajrit”, njoftoi policia.
Sakaq kujtojmë se një tjetër shpërthim masiv ka ndodhur këtë pasdite te “Rrethrrotullimi i Plasmasit” në Lushnje, duke i marrë jetën dy personave e duke lënë të plagosur disa të tjerë. Siç njoftoi policia, një vinç kishte prekur aksidentalisht linjën e tensionit të lartë, brenda një zone ku po ngrihej objekti në bashkëpronësi të deputetit socialist Bujar Çela. Ky i fundit ka mbetur po ashtu i plagosur, ndërsa mësohet se aktualisht është jashtë rrezikut për jetën.
LEXO EDHE:
Shpërthimi trondit Lushnjen, 2 të vdekur dhe 7 të plagosur, mes tyre deputeti i PS
