Eshtë vetëdorëzuar këtë të enjte në polici, 43-vjeçari Perlat Merlika, i cili plagosi me armë zjarri një ditë më parë në Fushë-Krujë, 57-vjeçarin Artan Goga.
Ngjarja u regjistrua mbrëmjen e djeshme në rrugën “Asim Zeneli”, ku Merlika dhe Goga kanë qenë bashkë në një lokal duke luajtur tavëll, lojë e cila ka shkaktuar dhe një konflikt mes tyre. Pas sherrit në lojën e tavullit, pasi kanë dalë nga lokali, Merlika e ka qëlluar me armë Gogën, të cilin plumbi e ka zënë në shpatull.
Pas krimit, autori Perlat Merlika u largua në drejtim të paditur, dhe mbrëmjen e sotme është vetëdorëzuar.
“Ditën e sotme, është vetëdorëzuar në Komisariatin e Policisë Krujë dhe u arrestua shtetasi P. M., 43 vjeç, banues në Krujë.
Ky shtetas, ditën e djeshme, për motive të dobëta, ka qëlluar me armë zjarri shtetasin A. G., i cili ndodhet në spital, jashtë rrezikut për jetën”,- njofton Policia.
Materialet do ti kalojnë Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprime të mëtejshme procedurale.
