Gjatë pritjes në tapetin e kuq të liderëve të Ballkanit Perëndimor dhe zyrtarëve të BE-së para nisjes së samitit, kryeministri Edi Rama është vënë në siklet nga një gazetar i televizionit shtetëror italian “RAI 3”.
Gazetari italian e ka pyetur kreun e qeverisë shqiptare nëse a do të paguajë për Francesco Becchetti-n, pas humbjes së gjyqit në Arbitrazh për televizion Agon Channel, që u mbyll nga arroganca e pushtetit të Edi Ramës, pavarësisht dënimit që drejtësia shqiptare vendosi ndaj biznesmenit italian.
“Nuk e njoh,” u përgjigj Rama ndërsa gazetari tentoi të pyeste sërish, por kryeministri iu përgjigj me të njëjtat fjalë.
Gazetari italian ngriti pretendimin e shfaqur në mediat italiane se paratë që biznesmeni italian ka fituar në arbitrazh, mund të mbahen nga paratë që qeveria italiane do i japë Shqipërisë për ngritjen e kampeve për strehimin e refugjatëve afrikanë nga Italia.
I pyetur mbi këtë marrëveshje, Rama pretendon se Shqipëria nuk do të përfitojë asgjë. “Zero lekë do të marrë” – u përgjigj kryeministri shqiptar.
Por duket se gazetari nuk e ka lënë me kaq, ndërsa shtoi se çfarë ndodh me marrëveshjen nëse ndryshohet pushteti dhe Rama i thotë se ai do të jetë edhe 5 vjet këtu.
