Avokatët kërkuan pafajësi për klientët e tyre dhe në rast dënimi, pezullim i dënimit me burg, shërbim prove, ose punë në interes të publikut.
Për mediat, avokati i Belerit tha pas seancës se procesi është i paligjshëm dhe se arsyeja se pse Beleri po mbahet në burg, është për të mos e lejuar të drejtojë bashkinë e Himarës.
“Provuam me prova që Prokuroria nuk na ka dhënë prova, për bashkëpunëtorin e policisë dhe Prokurorisë. Cituam dhe udhëzimin përkatës ku është paguar në mënyrë të paligjshme. Pasi është arrestuar Beleri, kanë filluar të rregullojnë të gjitha letrat. Proces i paligjshëm dhe i montuar, standard i dyfishtë. Nga data 8 maj deri në 14 maj janë siguruar tabulatet, por ai nuk ka qenë fare në Himarë. S’na kanë dhënë as tabulatet e telefonave të Arsenit. Kanë qëllim ta dënojnë sepse duan të mbajnë bashkinë e Himarës. 10 muaj burg është boll”, tha ai.
Kandidati i koalicionit “Bashkë Fitojmë”, Fredi Beleri u arrestua vetëm 2 ditë para zgjedhjeve lokale të 14 majit 2023 për “korrupsion aktiv në zgjedhje” dhe për rrjedhojë nuk ka mundur të betohet pasi nuk i është dhënë leje për të dalë nga qelia.
Vetë Beleri ka mohuar akuzat dhe ka deklaruar se arrestimi i tij ishte “politik” me urdhër të kryeministrit Edi Rama.
Mbajtja në qeli dhe mosbetimi i Belerit ka shkaktuar përplasje diplomatike me Tiranës e Athinës zyrtare.
