Gjykata e Posaçme ka shtyrë seancën paraprake ndaj ish-kryebashkiakut të Durrësit, Vangjush Dakos dhe të bashkëpandehurve.
Shkak është bërë mospërgatitja nga SPAK e akt-ekspertimit financiar të kërkuar nga gjykata në seancën e 2 shkurtit. SPAK kishte 25 ditë kohë për realizimin e aktekspetimit, por në mungesë të saj seanca u shty për në 18 mars në orën 13:00.
GJKKO i kërkoi SPAK-ut të realizohet akt ekspertimi për shëtitoren, për të cilën pretendohet se iu rrit vlera me dhjetëfish, duke i shkaktuar shtetit një dëm prej 18 milionë lekësh.
Bëhet fjalë për një procedurë prokurimi të bërë në vitin 2014 nga Bashkia Durrës për shërbim konsulence për projektin e Promenadës Bregdetare dhe Plazhin publik nga Bërryli deri në Currila.
Vangjush Dako u arrestua më 6 qershor me urdhër të Prokurorisë së Posaçme me dyshimet se ka shpërdoruar detyrën në dy raste.
Rasti i parë lidhet me një objekt që sipas hetimeve ka ndërtuar disa kate pa leje, të legalizuara me procedura që dyshohen jo të rregullta. Objekti pësoi dëmtime të konsiderueshme nga tërmeti i 26 nëntorit 2019. Pas kësaj, për çështjen pati një kallëzim nga banorët e këtij pallati. Dako akuzohet dhe për një procedurë tenderimi, vlera e të cilit sipas hetimeve, është fryrë artificialisht nga Bashkia Durrës. Kallëzimi për parregullsi në këtë tender është bërë nga ish-kreu i PD-së Durrës, Ferdinand Xhaferraj.
