Ditën e sotme do të mbahet Samiti i Investimeve në Ballkanin Perëndimor 2024, që do të zhvillohet në selinë e BERZH-it në Londër.
Ky aktivitet është organizuar nga Banka Evropiane për Rindërtim e Zhvillim ku do të marrin pjesë krerët e qeverisë së 5 vendeve në rajon.
Kryeministri Rama nuk do të ketë mundësi të jetë i pranishëm për shkak të axhendës, teksa pritet të jetë pjesë e diskutimeve nëpërmjet lidhjeve ‘online’.
Ky Samit që do të zhvillohet në qytetin e Londrës ka si synim të nxjerrë në pah mundësitë për investime në Ballkanin Perëndimor, si dhe të promovojë projekte rajonale.
Ballkani Perëndimor është një rajon prioritar për BERZH-in. BERZH mbetet një nga investitorët më të mëdhenj institucionalë në vendet e rajonit, me më shumë se 18 miliardë euro të investuara deri më sot.
Sesioni do të ketë pyetje dhe përgjigje të zgjeruara me investitorët e huaj. Duke qenë se tranzicioni i gjelbër është prioriteti kryesor i Bankës në rajon, do të ketë një panel të veçantë për Energjinë e Gjelbër në Ballkanin Perëndimor, i cili do të bashkojë politikëbërësit kryesorë (të parashikuar në nivel ministror) dhe investitorët për një diskutim mbi maksimizimin e kapitalit privat, mobilizimi për të përshpejtuar dekarbonizimin e rajonit.
