Një shpërthim me tritol ka ndodhur në një banese private, në lagjen numër 4, në Durrës. Banesa në fjalë është e 35-vjeçarit Ilir Koçilja, i arrestuar si autori i vrasjes me thikë të Halili Kokës, ngjarje e ndodhur më herët gjatë muajit.
Nga shpërthimi ka dëme materiale, ndërkohë që policia konfirmon se në banesë nuk banonte njeri pas arrestimit të 35-vjeçarit, familjarët e të cilit jetonte jashtë Shqipërisë. Përveç shtëpisë, raportohet se dëmtime ka pasur dhe një automjet parkuar aty pranë.
“Rreth orës 19:55, në lagjen nr.4, Durrës, në pjesën e jashtme të dritares së banesës së shtetasit I.K., në të cilën nuk banon njeri, është hedhur dhe ka shpërthyer një sasi e vogël lëndë plasëse duke shkaktuar vetëm dëme materiale. Grupi hetimor ndodhet në vendngjarje dhe nën drejtimin e Prokurorisë vijon punën për zbardhjen e ngjarjes identifikim dhe kapjen e autorit/ve”, njoftoi policia.
Banorë të lagjes e përshkruan shpërthimin si “të fuqishëm”. Ata thonë se është shkaktuar “zhurmë e madhe” dhe i ka shqetësuar. Disa prej tyre kanë dalë nga banesat për tu informuar se çfarë kishte ndodhur.
Vrasja
Vrasja ndodhi rreth mesditës më 14 Shkurt, në lagjen numër 4. Sipas hetimeve, Halil Koka është konfliktuar verbalisht me 35-vjeçarin Ilir Koçilja. Debati agravon dhe në një moment, Koçilja dyshohet se ka goditur me thikë Kokën.
Dëshmitarët kanë lajmëruar autoritetet, ndërsa i lënduari është transportuar për në spitalin rajonal, por, gjatë rrugës ka humbur jetën.
Ilir Koçilja u largua nga vendngjarja pas krimit për tu arrestuar disa orë më pas, po në Durrës. Policia njoftoi pas krimit se 35-vjeçari “dyshohet se vuan nga sëmundje mendore”.
Ai u la në qeli nga gjykata e Durrësit që caktoi për të masën e arrestit me burg.
Dëshmia
Në dëshminë e dhënë për hetuesit, 35-vjeçari tha se vrasja erdhi pas një konflikti për prakimin.
“Me Halilin ishim fqinj. Nuk shkonim mirë me njëri-tjetrin. Ai linte makinën te hyrja e pallatit. I kisha thënë disa herë që mos ta linte aty se pengonte qytetarët që të kalonin për të shkuar në shtëpi. Kur i thashë mos e lër më makinën aty, ai më ofendoi. S’i ktheva përgjigje. Kur dola ditën tjetër e pashë makinën, po prapë të parkuar aty. Nga inati, ia gërvishta me thikë në pjesën e derës se pasagjerit dhe ika. Prapë ditën tjetër e kishte lënë aty dhe unë prapë ia gërvishta. Erdhi më kapi një ditë dhe më tha ti e ke gërvishtur makinën time .
Po i thashë ‘unë ta gërvishta’. Mos e lër më aty i thashë. Aty debatuam, kush je ti, kush jam unë. Nisi të më kërcënonte. Do të vras, do të fus në bagazh. Unë e kisha thikën me vete. E pashë që doli nga lagja në rrugë kryesore. Iu afrova dhe i thashë “ti do më marrësh zvarrë mua dhe do më futesh ne bagazh”. Ai më shau. Aty m’u errësuan sytë dhe e qëllova me thikë. Më pas u largova dhe u fsheha për disa orë te lagja 11 deri sa më kapet ju. Nuk e dija se kishte vdekur. Mendova se e plagosa. Nuk kam asnjë konflikt tjetër me atë. As i kisha borxh para dhe as më kishte. Me vjen shumë keq për atë që ndodhi, jam penduar. Po konfliktin e nisi Halili”, ka deklaruar ndër të tjera Ilir Koçilja.
Hetuesit nuk përjashtojnë që ngjarja e sotme të ketë lidhje me vrasjen e 14 Shkurtit.
Lexo edhe:
I maskuar me kapuç, ky është i dyshuari i vendosjes së tritolit në Durrës
