Kombëtarja shqiptare e basketbollit ka debutuar me paraqitje dinjitoze në rrugëtimin e saj në grupin C të para-eliminatoreve të Kampionatit Botëror.
Në sfidën e luajtur këtë të diel në Yerevan, kuqezinjtë tanë u mundën me rezultatin e ngushtë 79-84 përballë Armenisë në fushë të huaj. Ndeshja ka qenë gjatë gjithë kohë e ekuilibruar, ku ekipi i drejtuar nga trajneri Erkan Karaj edhe mund ta kishin fituar.
Në një ndeshja të barazpeshuar, 10-minutëshi i parë ka qenë i luftuar pikë për pikë dhe është mbyllur në favor të vendasve, me vetëm një pikë epërsi, 24-23. Ai i dyti ka qenë më i mirë për armenët, të cilët e fitojnë atë 24-19 dhe shkojnë kështu në pushimin e madh midis dy gjysmave duke kryesuar 48-42.
Por, basketbollistët kuqezinj kanë dalë të frymëzuar nga dhomat e zhveshjeve, duke e fituar 10-minutëshin e 3-të, 17-14 dhe duke e shkurtuar në vetëm 3 pikë, 59-62, epërsinë e vendasve pas një gjysmë ore lojë.
Madje në 10-minutëshin e 4-t, kuqezinjtë kanë qenë vetëm dy pikë prapa Armenisë, duke patur disa mundësi për të barazuar shifrat dhe për ta çuar të paktën takimin në shtesë. Por, disa gabime në gjuajtjet për 3 pikë kanë bërë që skuadra vendase të përfitojë dhe ta mbyllë takimin në favor të saj, teksa e fiton 10-minutëshin e 4-t dhe të fundit, 22-20, dhe gjithë ndeshjen me shifrat 84-79.
Daniel Lekndreaj me 19 pikë ishte shënuesi më i mirë për kuqezinjtë në këtë ndeshje, ndërsa Hamati realizoi 16 pikë e Dusha 15 pikë, ndërsa Frenki Lilaj regjistroi shifrën më të lartë të kërcimeve, 10.
Për armenët u dalluan Spight me 31 pikë e Jones me 22 pikë, ndërkohë që Shqipëria dominoi lojën nën tabelë (51 rebound kundrejt 30 të kundërshtarit).
Gjithsesi,pavarësisht humbjes, vlen të theksohet fakti se trajneri Erkan Karaj i ka dhënë një tjetër fytyrë kombëtares shqiptare të basketbollit, me një ekip thuajse të rinovuar, dhe nëse fitorja nuk erdhi sot, ndoshta dhe për shkak të fatit, me siguri do të vijë në ndeshjet e ardhshme.
Vlen të theksohet dhe fakti se takimi ka nisur me një akt solidariteti të jashtëzakonshë, ku dy ekipet dhe 4500 të pranishëmit në sallë mbajtën një minutë heshtje në nderim të 16-vjeçarit Alteo Hyseni, që humbi jetën në mënyrë tragjike të shtunën në Pallatin e Sportit “Asllan Rusi” në Tiranë, dyshohet për shkak të një ataku kardiak.
I pranishëm në Yerevan ka qenë dhe kreu i Federatës Shqiptare të Basketbollit, Avni Ponari, i cili ka përcjellë atmosferën në sallë përmes postimeve në profilin e tij në rrjetet sociale.
Shqipëria do të rikthehet në parket më 21 nëntor për ndeshjen e dytë në grup, teksa do të ketë përballë Austrinë.
Armeni – Shqipëri 84-79
(24-23, 24-19, 14-17, 22-20)
ARMENIA: Tatevosyan (11), Jones (22), Zargaryan (7), Spight (31), Tavitian (10)/ Mkrtumyan (3), K.Melikyan, Y.Melikyan, Mikayelyan. Në dispozicion: Mikaelyan, Gevorgyan. Trajner: Alexander Zampier
SHQIPËRIA: Hamati (16), Dusha (15), Lekndreaj (19), Hysenagolli (6), Hysa (7)/ Lilaj (6), Taflaj (6), Tola (4), Strazimiri. Në dispozicion: Prodani, Hajdari, Memçaj. Trajner: Erkand Karaj
Gjyqtarë: C. Stoica (Rumani), Z.Mitrovski (Maqedoni e V.), E.Tsolakos (Greqi),
Komisioner: T.Kudlicki (Poloni)
