Nga Boldnews.al
Brenda pak ditësh, Gjykata Kushtetuese pritet të japë vendim për një çështje të rëndësishme civile, të cilën e ka regjistruar rreth një vit më parë. Ky rast ka thithur si “letër lakmuesi” disa personazhe të biznesit e politikës, por veçanërisht një person të shpallur “non grata” nga Departamenti Amerikan i Shtetit.
Të dhënat e siguruara nga “Boldnews.al” tregojnë se ky personazh, i cili vijon të jenë nën shënjestrën e Shteteve të Bashkuara të Amerikës, duket se po lobon për orientimin e vendimit gjyqësor drejt njërës palë.
Është personazh me fuqi ekonomike dhe që qëndron rrotull pushtetit politik.
Këtij personazhi i është vënë në dispozicion një “bazë të dhënash” për gjyqtarët kushtetuese dhe ai dikujt i dërgon mesazh, duke i kujtuar ndere që mund t’i ketë bërë më parë.
Dikujt tjetër i premton avenir pas përfundimit të mandatit në Kushtetues, e dikujt-dikujt i përmend punësimin e familjarëve në administratën shtetërore.
Natyrisht, këto janë të dhëna konfidenciale dhe vështirë për t’u provuar, pasi faktet i dinë ata që kanë marrë “mesazhet” përshëndetëse nga ky personazh “non grata”.
Por, i dinë edhe partnerët ndërkombëtarë, të cilët kanë nën monitorim jo vetëm personazhin “non grata”, por edhe vendimmarrjen e Gjykatës Kushtetuese pasi rasti konsiderohet sensitiv dhe me impakt publik.
Dhe, interesimi i këtij personazhi “non grata” për çështjen civile që pritet të shqyrtohet së shpejti, ka ngritur receptorët e partnerëve ndërkombëtarë edhe mbi vetë vendimmarrjen e Gjykatës Kushtetuese, për të kuptuar nëse “Drejtësia e Re” vijon t’i përulet këtij personazhi, i cili është “vulosur” nga Departamenti i Drejtësisë.
Partnerët ndërkombëtarë, sidomos Shtetet e Bashkuara të Amerikës, deri më tani janë shndërruar në mbrojtësin më të fortë të sistemit të ri të drejtësisë në Shqipëri, edhe kur institucione të ndryshme cedojnë në vendimmarrjet e tyre.
Partnerët ndërkombëtarë kanë toleruar disa vendimmarrje të dyshimta të drejtësisë, në rastet kur qëndrimet e trupave gjyqësore kanë shkuar në të kundërt të atyre që janë “dizenjuar” nga Departamenti Amerikan i Shtetit.
Tashmë, është radha që një “non grata” po tenton të ndikojë tek Gjykata Kushtetuese për një vendim në favor të njërës palë.
Duhet parë nëse partnerët ndërkombëtarë, të cilët po e monitorojnë këtë proces, përfshirë edhe qasjen e gjyqtarëve kushtetues, do të tolerojnë që një “non grata” të diktojë vendime në Gjykatën më të lartë të vendit.
