Një vajzë 19-vjeçare është arrestuar nën akuzën se ka vrarë të atin në Shënvlash të Durrësit dhe e ka varrosur trupin e pajetë në oborrin e banesës, duke fshehur ngjarjen. Familjarët e tjerë ndërkohë, kishin bërë kallëzimin për zhdukjen e kryefamiljarit.
Pas 10 ditësh hetime, blutë e Durrësit arritën të zbulonin kufomën dhe të zbardhnin krimin. E reja pranoi të jetë ajo autorja e vrasjes dhe groposjes së trupit në oborrin e banesës. Shkaku që sipas saj e ka çuar në kryerjen e krimit ka qenë nxitja prej babait për t’u fejuar pa dëshirën e saj, si dhe konfliktet familjare që kanë patur.
Në pranga u vu Hygerta Meta, e akuzuar për veprën penale “Vrasja për shkak të marrëdhënieve familjare” në dëm të të atit Pëllumb Meta, 49 vjeç.
Hetimet për rastin vijojnë për të zbuluar nëse ka persona të tjerë të implikuar në ngjarje.
Banesa e familjes Meta
Kallëzimi për zhdukje
Rreth orës 22:30 të së martës së 13 Shkurtit, djali 25-vjeçar i Pëllumb Metës është paraqitur në komisariat për të denoncuar zhdukjen pa gjurmë të të atit.
I riu ka deklaruar para uniformave blu se babai ishte larguar nga banesa dhe se familja (nëna, vëllai dhe dy motrat) kishte humbur kontaktet me të.
Pas këtij kallëzimi, efektivët kanë nisur kërkimet dhe tre ditë më vonë (17 Shkurt) kanë gjetur automjetin e të parkuar të 49-vjeçarit në aksin rrugor Shënavlash-Sektor Rinia.
Grupi i posaçëm hetimor i ngritur për këtë rast nën drejtimin e Prokurorisë së Durrësit, vijoi hetimet dhe kërkimet, pasi dyshohej se 49-vjeçari ishte zhdukur.
Megjithatë, hetuesin zbuluan më vonë se 49-vjeçari nuk ishte zhdukur, por ishte vrarë në banesë. Dhe se autore e vrasjes së 49-vjeçarit është vajza e tij, Hygerta Meta, 19 vjeçe – e cila është arrestuar për veprën penale “Vrasja për shkak të marrëdhënieve familjare”.
“Donte të më fejonte pa dëshirën time”
Vajza ka deklaruar para hetuesve se motivi i vrasjes ka qenë nxitja prej babait, për t’u fejuar pa dëshirën e saj, si dhe konfliktet familjare që kanë patur, konfirmoi zyrtarisht policia e Durrësit. Ndërkohë, burime thanë se vajza, studente për ekonomi-biznes në Tiranë, ka dëshmuar po ashtu se djali që donte ta fejonte i ati me mblesëri jetonte në Itali si emigrant, por ajo nuk e donte.
Lidhur me dinamikën e vrasjes, ajo ka thënë se e ka vrarë të atin në kasollen e lopës me pistoletën që 49-vjeçari mbante për arsye të punës si roje nate dhe pasi e ka mbështjellë me qese, e ka groposur në oborr, ku edhe u gjet trupi i pajetë brenda një grope rreth 1.5 metra.
E reja nuk ka shprehur pendesë për vrasjen e të atit, të qëlluar 4 herë me armë zjarri, duke deklaruar se ai i “kishte nxirë jetën” asaj dhe familjarëve të tjerë.
Vendi ku u gjet i varrosur trupi i pajetë
“Nuk pendohem që e kam vrarë tim atë. Ai na ka torturuar dhe i ka nxirë jetën nenës time. Unë jam fëmija i vogël i familjes. Motra është me e madhja, është e martuar janë 2 vëllezërit dhe pastaj unë. Mami dhe ne nuk kemi folur kurrë ne familje. Për gjithçka fliste dhe vendoste babai. Ai nuk na pyeste kurrë çfarë dëshironim. Kur mori vendimin për martesën time aty erdhi fundi. Nuk dëgjoi çfarë unë doja. Mu mblodh një urrejtje për një kohe te gjate. Ditën e ngjarjes nuk u konfliktuam fare. Mora armen qe babi përdorte kur shkonte ne pune si roje dhe e qëllova brenda kasolles se bagëtive. Pas krimit e kam mbështjelle me një çarçaf, pastaj me fasho e ne fund me qese. Armen e hodha buzë detit”, mësohet të jetë shprehur e reja.
Po ashtu, vajza ka marrë përsipër edhe spostimin e automjetit të të atit nga banesa.
Ndërkohë, arma e krimit nuk është gjetur ende.
Dyshime për bashkëpunëtorë
“Grupi i posaçëm hetimor po vijon hetimet e thelluara për të identifikuar dhe vënë përpara përgjegjësisë ligjore, shtetas të tjerë të implikuar në këtë ngjarje”, thuhet në një njoftim të policisë.
Burime pranë grupi hetimor bëjnë me dije se në pyetje janë marrë dhe anëtarët e tjerë të familjes Meta, të cilët kanë deklaruar se nuk kanë pasur dijeni për krimin.
Sipas të njëjtave burime, dëshmitë e vajzës përputhen me provat e gjetura duke konfirmuar se ka qenë ajo që ka kryer vrasjen, megjithatë ka dyshime se është ndihmuar në krim nga të tjerë persona.
Edhe të afërm të familjes Meta, në deklaratat e dhëna për mediat, kanë ngritur dyshime se 19-vjeçarja nuk mund ta kryente krimin e vetme.
Trupi i Pëllumb Metës është zhvarrosur dhe është transportuar në Institutin e Mjekësisë Ligjore, për kryerjen e ekspertizës së mëtejshme.
Lexo edhe:
“E vrava në kasolle…”/ Zbardhet DËSHMIA e vajzës që ekzekutoi babanë
19-vjeçarja: Kisha dy mundësi! Ose ta vrisja, ose të arratisesha
Pamjet nga banesa ku ndodhi krimi
Pasi vrau të atin, vajza lëvizi edhe makinën
Të afërmit: Nuk dinim gjë! E morëm vesh nga televizori
Krushku i familjes Meta: Vajza s’mbyste dot një pulë!
Gruaja e Pëllumb Metës: Ishte autoritar! Bënim si na thoshte
Momenti kur nxirret trupi i pajetë i Pëllumb Metës – VIDEO
Hygerta Meta shkon në vendin e krimit, tregon dinamikën e ngjarjes – VIDEO
