Kreu i grupit parlamentar të PD-së, Gazment Bardhi, në përfundim të seancës plenare e cila zgjati më pas se 8 minuta, komentoi heqjen e amnistisë penale nga rendi i ditës, me kërkesë të PS-së. Bardhi tha se PS u tërhoq pasi nuk arriti dot pazarin për të amnistuar ministra e kryetarë bashkish të korruptuar.
“Ju e patë sot në rendin e ditës nuk kishte asgjë të mirë për qytetarët shqiptarë, ka kohë që kuvendi është shndërruar në organ që nuk i trajton ligjet në dobi të qytetarëve, por vetëm ligje me porosi në dobi të një grushti njerëz. Për shkak se nuk arritën dot pazar e tërhoqën amnistinë, nga një pr.ligj humanitar nga ku do duhet të përfitonin qytetarët e zakonshëm që ndodhen në burg, e shndërruan në ligj për të amnistuar ministra, kryetarë bashkish e drejtorë të korruptuar. Mbetet e papranueshme, tentuan të mashtronin opinion publik duke ia faturuar opozitës. U tërhoqën nga pr.ligji që e kishin miratuar në komisione me procedurë jo transparente.”- tha Bardhi.
Bardhi komentoi edhe miratimin e marrëveshjes me Italinë për emigrantët duke thënë se ishte një ligj i turpshëm.
“Ligji i dytë ishte ligji i turpshëm i sjelljes së emigrantëve në Shqipëri. Duke shprehur vlerësimin për ndihmën që Italia i ka dhënë Shqipërisë dhe shqiptarëve në ditë të vështira, kjo marrëveshje tej pritshmëritë e qytetarëve shqiptarë në raport me këtë marrëdhënie sa kohë cenon sigurinë kombëtare të Shqipërisë”, tha Bardhi.
