Ministrja e Turizmit dhe Mjedisit, Mirela Kumbaro, pas seancën plenare, foli për miratimin e ndryshimeve në ligjin për zonat e mbrojtura, i cili sipas opozitës është korruptiv, në funksion të disa njerëzve pranë qeverisë dhe që parashikon 14 investime strategjike në këto zona.
Kumbaro arsyetohet se ligji i ri është një kërkesë e bashkive, i konsultuar gjerësisht me shoqërinë civile dhe se ka vija të kuqe që nuk mund të shkelen pasi nuk duhen prekur direktivat e BE-së.
“Kjo është një kërkesë e shumë kryetarësh bashkish që kërkojnë një tjetër bashkëpunim. Kjo ka nisur muaj më parë. Ka pasur konsultime publike dhe kemi pasur takime me përfaqësues të shoqërisë civile. Dua të kujtoj shembullin pjekurinë për lumin e Vjosës, i cili u shpall park kombëtar, i pari i një lumi të egër. Kjo mazhorancë ka vullnetin që votoi në dhjetor një ligj që anëtarëson Shqipërinë në organizatën e konservimit të natyrës. Qeveria është marrë gjatë më draft/ligjin që janë disa linja të kuqe që nuk duhet të preken. Nuk duhen prekur direktivat e BE”, tha Kumbaro.
Më tej, Kumbaro mohoi se do të ketë një resort në Parkun e Divjakës.
“Në 2021, Shqipëria kishte 17% të territorit zonë të mbrojtur dhe tani kemi më shumë se 21%. Nuk është e lehtë për një vend si Shqipëria për të pasur 1/5 e territorit zonë të mbrojtur. Nuk ka asnjë projekt për një resort në parkun e Divjakës. Janë lajme të pavërteta. Me BE dhe partnerët jemi në komunikim për të shpjeguar se nuk do të preket sipërfaqja e territoreve të mbrojtura. Nuk do të ketë ndarje të territoreve të zonave të mbrojtura me bashkitë. Do të ketë rregulla më të qarta. Nuk mund të ketë të njëjta rregulla si në lagunë apo mal. Ka njerëz në këto zona që nuk mund të bëjnë shtesa në banesë apo të ndërtojë agroturizme. Vetëm në nënzonat ku lejohen aktivitetet turistike, brenda kritereve strikte do të jenë të mundura të zhvillohen me filtra striktë. Vullneti i kësaj qeverie për të mbrojtur zonat e mbrojtura është në nivelin më të lartë”- përfundoi Ministrja.
Deputetja demokrate Jorida Tabaku paralajmëroi pak më parë se Shqipëria shumë shpejt pritet të marrë një notë protestë nga Bashkimi Europian në lidhje me ligjin për zonat e mbrojtura, të cilin mazhoranca e miratoi në seancën e fundit të Kuvendit, vetëm me votat e saj.
