Zëvendësministrja e Arsimit dhe Sportit, Albana Tole u lirua këtë të martë nga detyra me një vendim të Këshillit të Ministrave. Ajo qëndronte në këtë detyrë prej 3 nëntorit të vitit 2021, kohë kur zëvendësoi të shkarkuarin Oltion Rrumbullaku.
Por, emri i Albana Toles, nuk i ka shpëtuar akuzave të opozitës. Në shtator të këtij viti, Tole u vendos në qendër të akuzave nga PD, për një tender të aprovuar pa garë sipas tyre nga Ministria e Mbrojtjes.
Zëdhënësja e PD-së për antikorrupsionin, Genta Vangjeli në një dalje për mediat akuzoi zv/ministren e Arsimit se nëpërmjet kompanisë së familjes ka fituar tenderin e shpallur më datë 3 korrik 2023 për “Blerje materiale për xhenion”. Tole zotëron 15% të aksioneve në kompaninë në fjalë, ndërsa procedura tenderuese kapte shifrën e 64.342 milionë lekë, (të reja).
“Ministria e Mbrojtjes për këtë procedurë shpalli fitues ofertuesin e vetëm me vlerë 64.3 milion leke ose pothuajse 97% e fondit limit. Informojmë publikun se në zotërim aktiv të aksioneve të kesaj shoqërie rezulton pronare me 15% zv.Ministrja e Arsimit Albana Tole në këtë detyre prej nëntorit 2021. A ishte në dijeni të këtij fakti Autoriteti Kontraktor i cili shpalli fituesin për prokurimin e mësipërm? Nga transaksionet e Thesarit rezulton se gjatë vitit 2022 dhe 2023 Tirana Due shpk ku është pronare aktive edhe zv.ministrja, ka përfituar 555.306.360 milion lekë të vjetra të gjitha nga Ministria e Mbrojtjes (Reparti Ushtarak Nr.4300 Tirane)“, tha Vangjeli në atë kohë.
