Banka Europiane për Rindërtim dhe Zhvillim (BEERZH) prezantoi në fund të muajit janar raportin vjetor të tranzicionit. Mes të tjerash, raporti vë në dukje se Shqipëria është i vetmi vend në Europën Juglindore ku kënaqësia e jetesës nuk është rritur krahasuar me vitin 2016.
Një sondazh i kryer nga Monitor në faqen e internetit dhe në rrjetet sociale tregoi se për pjesëmarrësit arsyet kryesore pse kënaqësia e jetesës në Shqipëri nuk rritet janë gjendja ekonomike dhe korrupsioni i lartë. Pak më shumë se 36% e pjesëmarrësve vlerësonin korrupsionin e lartë si arsyen kryesore, ndërsa afërsisht 36% e pjesëmarrësve të tjerë vlerësojnë gjendjen e pakënaqshme ekonomike si shkakun kryesor pse kënaqësia e jetesës nuk po rritet.
Pjesëmarrësit në sondazh votuan dobësinë e shtetit ligjor si arsyen e tretë që ka frenuar rritjen e kënaqësisë së jetesës mes shqiptarëve, me 16% të votave totale në sondazh.
Cilësia e dobët e sistemit arsimor dhe shëndetësor vlerësohet si arsyeja kryesore për 11% nga pjesëmarrësit në sondazh. Ndërkohë, vetëm 1% e pjesëmarrësve kanë votuar si arsye kryesore mungesën e rendit dhe të sigurisë.
Sipas raportit të BERZH, niveli i kënaqësisë së jetesës së shqiptarëve është njëlloj si në vitin 2016, ndërkohë që është dhe më e ulët se në vitin 2006, kur ka filluar matja e këtij indeksi.
Madje në 2006-n, Shqipëria ishte një nga vendet që kishte kënaqësinë më të lartë të të jetuarit ndër vendet e anketuara nga BERZH. Ndërsa në 2022, Shqipëria renditet ndër të fundit në rajonin e BERZH, së bashku me Maqedoninë e Veriut, Hungarinë, Turqinë, Lituaninë.
Sipas Raportit të BERZH, rritja mesatare e kënaqësisë së jetesës në rajon ndoshta reflekton rritjen e të ardhurave, zhvillime të favorshme në tregjet e punës (duke përfshirë një zhvendosje drejt punëve më të kënaqshme dhe me aftësi më të larta) dhe përmirësime në shëndet.
“Veçanërisht, vlerësimet e njerëzve për shëndetin e tyre janë përmirësuar ndjeshëm me kalimin e kohës, me vlerësime të tilla që përfshijnë jo vetëm aspektet fizike, por edhe shëndetin mendor. Rezultatet e sondazhit tregojnë se shqetësimi mendor shoqërohet me kënaqësi më të ulët dhe priret të jetë më i përhapur në vendet më të varfra dhe në mesin e individëve që janë financiarisht të pasigurt,” thuhet në raport.
Mbështetur në analizën e BERZH, mund të arrihet në përfundimin se faktorët e mësipërm në Shqipëri nuk kanë ndjekur një tendencë në përmirësim, ndryshe nga sa ka ndodhur ën shumicën e vendeve të tjera./Monitor
