Ka përfunduar mbledhja online e Asamblesë së PS-së, ku kryeministri Edi Rama kishte mbledhur në selinë rozë vetëm drejtuesit e qarqeve. Në fokus të diskutimeve kanë qenë riorganizimi i partisë dhe diskutimet për zgjedhjet parlamentare të 2025-ës.
Burime për mediat bëjnë me dije se Rama ka ngritur shqetësimin për probleme në përbërjen e organizatave dhe regjistrin e partisë. Ai ka kërkuar minimalisht 4 anëtarë të rinj në çdo organizatë.
“Kemi konstatuar që ka probleme organizative në përbërjen e strukturave por edhe në regjistrin e Partisë. Të bëhet cens i të gjithë anëtarëve të PS, të ndahet pjesa joaktive. Asambleja dhe drejtuesit e qarqeve të punojnë për të rritur me 4 anëtarë çdo organizatë. Punoni sikur në 15 mars të ishin zgjedhje të përgjithshme. Strukturat të jenë aty për njerëzit, inventar për çdo familje, problematikat që kanë.” mësohet të ketë kërkuar Rama.
Kryesocialisti ka kërkuar dokumentim organizatë më organizatë prej çdo drejtuesi politik dhe pas këtij dokumentimi do të bëhen zgjedhjet në parti në 15 mars-15 prill. Rama mësohet t’ju ketë thënë anëtarëve të punojne sikur në 15 mars të ishin zgjedhjet e përgjithshme.
Pas përfundimit të mbledhjes, Rama tha për mediat se PS është në fazën e angazhimit për anëtarësime të reja dhe në barazimin e kuotave gjinore në disa prej zonave rurale.
“Jemi me anëtarësimet shumë më mirë se çfarë disa nga kolegët mendonin dhe shpreheshin. Tani jemi në fazën e dytë që është faza e angazhimit për anëtarësimet e reja dhe adresimin e balancës gjinore në çdo qark. Nuk mund të them qarqe problematike po ka pika të caktuara kryesisht në zonat rurale ku duhet bërë më shumë punë për të pasur barazi gjinore mes burrave dhe grave”– tha Rama.
I pyetur nëse do të ketë ndryshime të drejtuesve të qarqeve politike, Rama u shpreh se ndryshimet janë pjesë e jetës së Partisë Socialiste.
“Ndryshimet janë pjesë e jetës së PS, prandaj PS është fituese sepse nuk pret që ta ndryshojnë tjerët por ndryshon veteveten. Unë shoh një angazhim pozitiv plus që sistemi ynë që ka një komponent gjithmonë e më të zhvilluar digjital, ka pasqyra që flasin vetë dhe nuk ka të bëjë vetëm me atë që raportojmë ne me fjalë”– shtoi kryesocialisti.
I pyetur në lidhje me protestën masive të opozitës, Rama u shpreh me ironi se nuk ka informacion për ndonjë organizim të opozitës, duke theksuar se nuk ka asnjë interes për të. Kreu i qeverise e quajti opozitën si një “konglomerat grupesh”.
“Nuk kam informacion për organizim të opozitës, nuk kam asnjë interes. Ne nuk kemi një problem sot për sot me as me kritikat dhe as me vetëkritikën sepse në Asamblenë e Përgjithshme që u zhvillua pak ditë më parë ka pasur plot kritika dhe vetëkritika, sot ishte dita për të vazhduar punën. Sa i takon asaj që ju thatë për opozitën, nuk është opozita janë konglomerate grupe dhe nuk kam asnjë interes”, tha Rama.
Asambleja e PS-së do të rimblidhet sërish më 16 mars në qytetin e Durrësit.
