Ministrja e Arsimit dhe Sportit, Ogerta Manastirliu është paraqitur këtë të hënë në Prokurorinë e Posaçme. Mësohet se Manastirliu ka qëndruar brenda ambienteve të SPAK për 2 orë e 15 minuta.
Në prononcimin për mediat ajo ka deklaruar shkurtimisht se është marrë në pyetje nga prokurorët e SPAK në cilësinë e personit që ka dijeni mbi çështjen e sterilizimit në kohën kur ka drejtuar Qendrën Spitalore Universitare Nënë Tereza (QSUT).
Në dosjen e SPAK theksohet se qendra e re e sterilizimit ishte inaguruar në vitit 2010-2011 dhe ish-ministri i Shëndetësisë, Ilir Beqaj ka marrë shkresë nga Ogerta Manastirliu, ish-drejtoreshë e QSUT-së në vitin 2014, për ta vendosur në punë, pasi kapaciteti i saj mbulonte 60 mijë ndërhyrje kirurgjikale.
Beqaj nuk e mori fare në konsideratë kërkesën, por i hapi rrugë koncesionit për mikun e tij, Ilir Rrapaj, siç rezulton nga hetimet.
