Aleatët e Alexei Navalny kanë akuzuar autoritetet ruse se “bënë gjithçka që munden” për të “shmangur” dorëzimin e trupit të liderit të opozitës ruse tek familja e tij.
“Tani është e qartë se vrasësit duan të mbulojnë gjurmët e tyre dhe për këtë arsye nuk po e dorëzojnë trupin e Alexeit, duke e fshehur atë edhe nga nëna e tij”.
Me këto fjalë, ekipi i Alexei Navalny, me një postim në Telegram, akuzon autoritetet ruse se nuk e kanë dorëzuar trupin e tij të pajetë “sepse nuk duan të dihet metoda që përdorën për të vrarë Alexein”.
Misteri mbi trupin e Navalny vazhdon teksa autoritetet ruse arrijnë në përfundimin se lideri i opozitës ruse nuk ka vdekur nga një akt kriminal, por nga “Sindroma e Vdekjes së Papritur”.
Nëna e Navalny, Lyudmila Navalnaya, udhëtoi të shtunën për në burgun ku djali i saj mbahej deri në vdekje. Asaj iu tha nga zyrtarët e burgut se djali i saj vdiq më 16 shkurt në orën 14:17 me orën lokale si rezultat i “sindromës së vdekjes së papritur”, sipas aleatit të shquar të Navalny, Ivan Zhdanov.
Megjithatë, kur nëna e tij shkoi në morgun e burgut në Siberi për të marrë trupin e tij, ajo zbuloi se nuk ishte aty.
Ku është Navalny? Askush nuk i përgjigjet Ludmila Navalny, e cila tani flet hapur për vrasje dhe zotohet të mos dorëzohet. “Dhe le të më futin në burg, unë do të bërtas”, thotë ajo.
Ajo tha se nënës së Navalny-t i ishte thënë nga një zyrtar burgu se trupi i djalit të saj ishte dërguar në qytetin e afërt të Salekhardit si pjesë e një hetimi për vdekjen e tij. Por kur ajo dhe avokatët e Navalny mbërritën në morg, ai u mbyll dhe punëtorët thanë se trupi nuk ishte aty.
Orë më vonë, Yarmysh tha se avokatëve të politikanit iu tha se trupi i Navalny nuk do t’u dorëzohej të afërmve të tij derisa të përfundonte një hetim për vdekjen e tij.
“Rezultatet supozohet se do të jenë të disponueshme javën e ardhshme. Është e qartë se ata gënjejnë dhe bëjnë gjithçka që munden për të shmangur dorëzimin e trupit,” tha ajo në X.
Me cilësimin e Alexei Navalny si “ekstremist” nga shteti rus, kushdo që demonstron për të, ose që tregohet se ka pasur ndonjë lidhje me të, rrezikon të arrestohet.
Ndërsa u arrestuan, bazuar në informacionin e transmetuar nga media ruse, më shumë se 400 rusë në 36 qytete për demonstrata pas vdekjes së Navalny.
Midis tyre, në Shën Petersburg u arrestua një prift, i cili njoftoi se do të bënte një varrim për të ndjerin. Sipas vejushës së Navalny, prifti Grigory Mikhnov-Vyatenko u prangos pranë shtëpisë së tij ndërsa po shkonte për në memorialin Solovetsky për viktimat e persekutimit politik në Bashkimin Sovjetik.
Pak më vonë, siç njoftoi në Telegram anëtari i opozitës Boris Vishnevsky, prifti Grigory Mikhnov-Vyatenko u dërgua në spital me një goditje në tru.
“Në komisariatin numër 43, avokati i tij thirri një ambulancë. Grigory u dërgua në spital ku u konstatua se ai duhet të trajtohet nga një ekip mjekësor”, tha Wisniewski.
Kështu, pasi prifti u arrestua dhe pësoi një goditje në tru, Kisha Ortodokse Ruse njoftoi se Mikhnov-Vyatenko nuk i përket rretheve të saj dhe i bëri thirrje botës ta injorojë atë.
