Policia e Shtetit ka dalë me një komunikatë zyrtare në lidhje me plagosjen e efektivit të Forcave të Ndërhyrjes së Shpejtë me armën e shërbimit në Tiranë.
Autoritetet bëjnë me dije se ngjarja ka ndodhur ditën e djeshme rreth orës 12:40, në ambientet e Njësisë së Sigurisë Publike Tiranë. Sipas njoftimit efektivi me inicialet Konstandin Çipi, gjatë përgatitjes për stërvitje, dyshohet se nga pakujdesia i ka shkrepur arma e shërbimit dhe për pasojë ka plagosur në këmbë, punonjësi e Policisë Inspektor Xhojsi Lamaj.
Efektivi i plagosur Xhojsi Lamaj bëhet me dije se ndodhet jashtë rrezikut për jetën, ndërsa efektivi që shkrepi armë aksidentalisht është pezulluar nga detyra. Raportohet gjithashtu se Agjencia e Mbikëqyrjes Policore, Prokuroria dhe Polcia Gjyqësore kanë nisur hetimet dhe kanë proceduar në gjendje të lirë efektivin Konstandin Çipi, për plagosje nga pakujdesia.
Njoftimi:
Më datë 15.02.2024, rreth orës 12:40, në ambientet e Njësisë së Sigurisë Publike Tiranë, punonjësi i Policisë Inspektor K. Ç., gjatë përgatitjes për stërvitje, dyshohet se nga pakujdesia i ka shkrepur arma e shërbimit dhe për pasojë është plagosur në këmbë, punonjësi i Policisë Inspektor Xh. L., i cili ndodhet në spital, jashtë rrezikut për jetën. Ndërsa punonjësi i Policisë K. Ç. është pezulluar nga detyra.
Menjëherë është ngritur grupi hetimor në drejtimin e Prokurorisë pranë Gjykatës së Shkallës së Parë të Juridiksionit të Përgjithshëm Tiranë dhe veprimet procedurale për këtë rast po kryhen nga AMP.
Drejtoria e Standardeve Profesionale ka filluar një hetim të thelluar administrativ për mosrespektimin e procedurave standarde për mbajtjen dhe administrimin e armëve të brezit, nga punonjësit e Policisë.
Në përfundim të këtyre veprimeve, Prokuroria, Policia Gjyqësore dhe AMP kanë nisur procedimin penal në gjendje të lirë, për punonjësin e Policisë K. Ç., për plagosje nga pakujdesia.
