Grupi parlamentar i PD-së zhvilloi për herë të parë një mbledhje të bashkuar të deputetëve të grupimeve Bardhi-Berisha brenda selisë blu. Rreth 30 deputetë u paraqitën, ndërkohë 9 të tjerë munguan, mes tyre edhe Sali Berisha që nuk mundte për arsye se ndodhet në arrest shtëpie.
Deputetët e tjerë që nuk ishin të pranishëm janë Jorida Tabaku, Saimir Korreshi, Ferdinand Xhaferaj, Ilda Dhori, Flamur Hoxha, Dashnor Sula, Emilja Koliqi dhe Kastriot Piroli.
Nga të gjithë këta, sipas Luçiano Boçit, i cili ishte i ftuar në emisionin “Opinion”, vetëm Jorida Tabaku është ajo që ka qëndrim me asnjë nga dy grupimet.
“Jo, refuzim, jo, por Jorida ka një qëndrim “as-as”, as me grupimin e zotit Bardhi. Çështje qëndrimi nga ana e saj. Më shumë Jorida që e ka shprehur qëndrimin e saj, ndërsa të tjerët besoj, edhe Xhaferaj mund të ketë ndonjë ngërç të vogël, por qëndrimet e tij kanë ndryshuar gjatë kësaj kohe. Pra të tjerët janë pjesë tashmë pjesë e grupit parlamentar dhe thjesht kanë munguar në aktin e ardhjes tek selia”, u shpreh Boçi.
Më 20 Shkurt, shumica dërrmuese e deputetëve të PD-së bashkë me disa aleatë opozitarë do të dalin në shesh për të protestuar. Ky aksion politik vjen me një frymë ndryshe pas thuajse 3 vitesh përplasje brenda Partisë Demokratike. Këtë bashkim të demokratëve, Luciano Boçi e sheh si një njohje të votës dhe statutit të kësaj partie. Ai theksoi se Sali Berisha është kryetari i PD për pjesën më të madhe të deputetëve.
-Mbi ç’bazë është bërë ky bashkim? Mbi ç’principe, mbi ç’marrëveshje? A do funksionojë ky fuzion i brendshëm, sepse 3 vjet përplasje mund të duan 30 vjet që të rikuperohen. Nganjëherë dëmi është aq i madh sa rikuperimi është shumë më i vështirë, cili do jetë aksioni konkret?
Luciano Boçi: Mbi bazën e një projekti politik që duhet të ketë një forcë politike dhe duhet të dijmë shumë mirë se ndarja nuk ka qenë ideologjike. Ndarje të tilla janë përfundimtare. Kanë qenë çështje qëndrimesh, perceptimesh të ndryshme. Në ligjërim ka qenë e tillë sepse në aksionin politik bërja e opozitës ka qenë një produkt nga të dyja grupet, madje e theksuar është bërë gjatë muajve të fundit. Është një proces në vazhdimësi pavarësisht qëndrimeve, sepse kemi dashur t’i përafrojmë qëndrimet dhe t’i pajtojmë. U shpreh qartë se ka deputetë që kanë mendime të ndryshme që diskutohen, por njohin faktin e votës dhe statutit të PD.
-Kjo do të thotë se Berisha tashmë është pranuar nga pjesa tjetër?
Luciano Boçi: Njihet edhe zoti Sali Berisha, por edhe Kuvendi i 11 Dhjetorit që ka qenë disi i kontestuar sepse dalja e zotit Berisha si kryetar është produkt i këtij Kuvendi. Procesi zgjedhor lindi nga ndryshimet statutore. Produkt i këtij bashkimi nuk është thjesht 20 Shkurti, është një stacion.
-Po për Shën Valentinin e gjetët të pajtoheshit?
Luciano Boçi: Ishte përpara Shën Valentinit, në vigjilje.
Nga ana tjetër, deputeti Ervin Salianji thotë se nuk ndryshon qëndrimi i tij për mosnjohjen e Berishës në krye të partisë më të madhe opozitare. Por shton se ka ardhur momenti që demokratët të bashkohen dhe se kjo protestë është vetëm hapi i parë i këtij procesi.
Ervin Salianji: Ky nuk është hapi fundor i bashkimit të opozitës, është hapi i parë jo vetëm paqes, por edhe për të shkuar më tej. Për ta çuar tek njerëzit që prej vitesh e kanë mbajtur barrën e opozitës. Nëse do të ishte për mua Sali Berisha nuk do të ishte kryetar i opozitës, por është pa dëshirën time. Duhet të rinovohet klasa politike në Shqipëri. Unë nuk ndryshoj nga bindjet e mia, por momenti është të jemi bashkë, që edhe nëse do kishim ndarje ideologjike të forta, në momentin që ka një dakordësi dhe po gjen mbështetje të madhe dhe në opinionin publik, nuk besoj që ka njeri në Shqipëri që nuk mendon se të gjitha institucionet në këtë vend i janë nënshtruar vullnetit të një individi.
