Erzeni do të presë Skënderbeun në Rrogozhinë për të bërë mes tyre llogaritë e javës së 24-të të Superiores.
Kjo përballje do të luhet ditën e shtunë në orën 13:30 dhe të dyja ekipet kanë detyrim fitoren.
Korçarët në bazë edhe të sfidave direkte shihen si favoritë, teksa dy ekipet janë përballur vetëm 2 herë në histori mes tyre. Në të dyja takimet skuadra e Ivan Gvozdenovic ka dalë fituese.
Në sfidën e parë mes tyre kanë fituar 2-1, ndërsa në duelin e dytë kanë triumfuar 1-0.
Gjithsesi asgjë nuk do të jetë e lehtë për korçarët pasi trajneri Gvozdenovic do të ketë mungesa të rëndësishme, ndërsa gjithashtu edhe lojtarë që janë në dyshime.
Mungon Randi Dumfur, i cili përfundoi në spital pas sfidës me Kukësin vazhdon të marrë mjekim dhe të jetë nën kujdesin e mjekëve. Ndërkohë tjetër mungesë është edhe ajo e Klevis Shaqes që gjithashtu ka probleme shëndetësore, ndërsa Dean Liço do të mungojë për shkak kartonësh.
Nga ana tjetër mbajnë pezull formacioni e korçarëve Ardit Nikaj dhe Rei Pecani. Të dy lojtarët vijojnë të kenë probleme fizike dhe gjendja e tyre do të shihet deri para sfidës.
