Ish-kryeministri Sali Berisha, foli nga dritarja e shtëpisë për mbështetësit demokratë që u mblodhën edhe pasditen e kësaj të hëne poshtë banesës së tij, për të kërkuar lirimin e tij nga arresti shtëpiak.
Gjatë fjalës në tubimin qytetar, Berisha nuk la pa përmendur edhe mbledhjen e deputetëve të opozitës në selinë blu.
Sipas Berishës, ‘43 deputetë të PD dhe koalicionit opozitar u mblodhën së bashku selinë e partisë dhe bënë realitet dëshirën e 700 mijë shqiptarëve’.
Berisha: Ka lot në sytë e demokratëve, por ato janë dhe do jenë lot gëzimi, sepse opozita është e bashkuar. Të dashur miq, në historinë e PD-së, opozitës shqiptare, por edhe Shqipërisë dhe kombit, për aq sa PD, forca kryesore opozitare e vendit është sot shpresë e vetme e shqiptarëve, sot pas një betejë të përbashkët 1-vjeçare, por edhe pas përplasjeve dhe kundërshtive hera herë edhe të forta, 43 deputetë të PD, të koalicionit opozitar, u mblodhën së bashku në drejtimin e kryetarit të grupit parlamentar në selinë e partisë dhe bënë realitet dëshirën e rreth 700 mijë shqiptarëve që votuan më 25 prill për PD-në dhe koalicionin e saj.
