Një 35-vjeçar është arrestuar në Skrapar, pasi ka kërcënuar një 28-vjeçare për ti grabitur telefonin.
Bëhet fjalë për shtetasin Besnik Kreci. Po ashtu, ai ka kërcënuar dhe kanosur me jetë edhe një 53-vjeçar, i cili ka qenë këmbësor dhe është përpjekur që të ndërhyjë në momentin kur ka parë se ai po kërcënonte me armë të renë.
Nga hetimet ka rezultuar se Kreci ka qënë i dënuar edhe më parë për veprat penale “Vjedhja me armë”, mbetur në tentativë, kryer në bashkëpunim, “Largimi i të burgosurit nga vendi i qëndrimit” dhe “Marrëdhënie seksuale ose homoseksuale me persona të pazotë për t’u mbrojtur”.
Sakaq gjatë kontrollit në çantën e dorës, të arrestuarit iu gjetën dhe iu sekuestruan në cilësinë e provës materiale, 1 armë zjarri pistoletë, 2 mjete prerëse (thika), 2 maska (kapuça), një palë doreza dhe një elektrik dore.
“35-vjeçari, i maskuar dhe duke kërcënuar me armë zjarri pistoletë, ka tentuar t’i vjedhë celularin, një 28-vjeçareje. Ai gjithashtu ka kanosur për jetën, një 53-vjeçar që ka ndërhyrë kur ka konstatuar tentativën për vjedhje. Si rezultat i veprimeve të shpejta në vendngjarje, shërbimet e Policisë e kanë gjetur dhe arrestuar shtetasin B. K., në afërsi të përroit të fshatit Çepan, ku kishte shkuar për t’u fshehur”, njofton policia.
