Asqiri Mandri, 34-vjeçari i arrestuar nën akuzat se ushtronte dhunë ndaj bashkëshortes, e kyçte në banesë dhe e monitoronte me kamera, është lënë në qeli.
Gjykata e Tiranës caktoi këtë të enjte ndaj tij masën e sigurimit personal “arrest me burg”.
Në fjalën e tij përpara gjykatës, 34-vjeçari ka mohuar që të ketë ushtruar dhunë ndaj bashkëshortes.
Ai pranoi se ishte personi që kishte vendosur kamerat, por shtoi se monitorimi u bë me qëllim që të ruante familjen e tij, pasi shkonte në Gjermani si emigrant.
34-vjeçari tha se konfliktet me gruan lindën pasi ajo i thoshte se do dal natën dhe do punoj si roje.
“Kamerat i kam vendosur për të parë gruan dhe fëmijët pasi isha jashtë shtetit. Kemi patur debate por jo dhunë. Sherr nisi pasi gruaja më thoshte që do ikte të punonte natën si roje”, tha ai në gjykatë.
Blutë e Tiranës njoftuan arrestimin e të riut dy ditë më thanë. “Nga veprimet hetimore të kryera ka rezultuar se 34-vjeçari ka ushtruar dhunë ndaj bashkëshortes së tij, të cilën e mbante të mbyllur në banesën e tyre ku kishte montuar kamera për të monitoruar lëvizjet e saj”, njoftoi policia.
Bashkëshortja e 34-vjeçarit u shpreh për uniformat blu se është dhunuar nga i shoqi, ndërsa më pas, në disa prononcime për mediat, mohoi se ndaj saj ishte ushtruar dhunë.
E ëma e të riut, tha për mediat se nusja “mori rrugën e gabuar”, teksa e akuzoi për lidhje jashtëmartesore.
