Personi që shihni në foton e mëposhtme është Selami Brahimi, i cili ra pre e një atentati pasditen e kësaj të enjte në Shkodër. Ngjarja ndodhi rreth orës 17:55, në lagjen “ 10 Korriku”, në hyrje të qytetit.
Selami Brahimi ndodhej në automjetin e tij tip “Citroen”, me të cilin kishte ndaluar, në momentin kur u qëllua nga pjesa e pasme me katër plumba. Xhami i pasëm i automjetit u thye totalisht, teksa Brahimi kaloi tek vendi i pasagjerit për t’u shpëtuar plumbave.
Ai mbeti i plagosur dhe u transportua në spital për të marrë ndihmë mjekësore, ku ndodhet jashtë rrezikut për jetën, teksa ka dhënë dhe dëshminë e tij për grupin hetimor.
Burime bëjnë me dije se dyshohet se autorët kanë qenë në këmbë. Policia bëri me dije se po këqyr kamerat e sigurisë si dhe po kontrollon zonën për të bërë të mundur identifikimin e autorëve.
Selami Brahimi nuk rezulton një person me probleme ligjore dhe aktualisht mbetet mister motivi i atentatit ndaj tij.
