Mbrojtësi Rustem Hoxha, deklaroi në emisionin “Ora Sport”, se fitorja me Erzenin ishte shumë e rëndësishme për klasifikimin e Dinamos, por theksoi se duhet t’i marrin ndeshjet me radhë.
Gjithashtu ai u ndal edhe te derbi me Partizanin, ndërsa e cilësoi pozitive merkaton.
Fitorja me Erzenin – “Prisnim një ndeshje të vështirë dhe ashtu rezultoi, por fatmirësisht ne morëm tri pikët me një fitore të thellë. Dy ndeshjet e fundit ishim shumë të rëndësishme dhe tani u shkëputëm pak nga fundi”.
Final Four – “Duhet të presim fundin, por nuk mund ta gjykoj nëse është e mirë apo jo si formulë. Me këtë skemë po shikojmë shumë gola, spektakël. Rrit konkurrencën dhe të ardhurat, por duhet të presim fundin ta gjykojmë”.
Objektivat – “Ne synojmë vetëm ndeshjen e radhës, tani jemi fokusuar te Partizani. Të zhvillojmë një ndeshje të mirë dhe të dalim me rezultat pozitiv, nëse do të luajmë me intensitet të lartë do të marrim maksimumin”.
Performanca më e mirë e një mbrojtësi – “Unë mendoj, por duke parë edhe në nivelin europian, mbrojtësit e qendrës janpin më të mirën pas moshës 27 vjeç sepse aty arrijnë kulmin dhe japin më të mirën. Kanë eksperiencë dhe pjekuri”.
Derbi ku do të luhet? – “Unë do të doja të luhej në Durrës sepse edhe ne si ekip jemi përshtatur mirë me fushën”.
Merkato – “Unë mendoj që drejtuesit kanë bërë maksimumin, lojtarët më të mirë që ishin në janar i kemi marrë në ekip. Kemi bërë një punë të mirë me afrimet dhe do ta tregojmë gjatë kohës. Forca e Dinamos është grupi”.
