Lojtari i kombëtares Odise Roshi duke folur në emisionin Analizë Kuqezi komentoi sezonin në Turqi me skuadrën e Sakaryaspor.
“Raketa” theksoi se është duke zhvilluar edhe një nga sezonet më të mirë në karrierë ndërsa zbuloi edhe arsyen e festimit si Cristiano Ronaldo pas shënimit të golit në ndeshjen e fundit të kampionatit.
Ndërkohë, nuk mungoi edhe një koment për kombëtaren e Europianin që zhvillohet në Gjermani në muajt e verës.
Sa më i vjetër aq më i mirë? “Si puna e verës”.
Kush është sekreti i formës në javët e fundit? “Ekipi po ecën mirë, pavarësisht një humbje për fakt të arbitrimit. Por, u rikthyem te fitorja, shënova golin e fitores. Jam në një formë të mirë, shpresoj të vazhdojmë me këtë formë, edhe pse jemi pa tifozë”.
Gol me kokë, shënon pak të tillë? Festa si CR7? “Kam shënuar edhe më parë. Festa ashtu më erdhi, e kam bërë për babain sepse kaloi një operacion të rëndësishëm. Ia kam dedikuar atij. Gjithçka ka kaluar me sukses”.
Statistikat, më i miri pas atij në 2019-20 me Akhmat Groznin? “Atëherë kam bërë një sezon të mirë, duke shënuar 11 gola në total. Ndjehem mirë dhe shpresoj të shënoj e të jap asist. Për mua e rëndësishme që të jem gjithnjë i rrezikshëm, dua të shënoj sa më shumë që të jem në formë”.
Jemi në vitin e Europianit kërkon të jesh pjesë? “Përderisa nuk jam tërhequr, jam në formë. Kam mbi 10 vite me kombëtaren, mjaftojë pak minuta për mua. Mund të jenë dy apo pesë minuta, unë kam shumë besim në fushë. Pastaj është trajneri që vendos, djemtë e meritojnë të gjithë. Kemi dalë të parët në grup, kombëtarja ka bërë paraqitje të jashtëzakonshme. Respekt për të gjithë çunat”.
Mbipopullimi në sulm te kombëtarja, si e sheh? “Po të isha në vend të Sylvinhos do ta kisha të vështirë, Manaj është në formë këtu në Turqi dhe kërkohet nga shumë ekipe. Cikalleshi duket si 28-vjeçar, të dy kanë shënuar shumë në Turqi. Uzuni gjithashtu, dihet edhe kualiteti i Brojës. Kthehet nga një dëmtim shumë i vështirë, e kam kaluar vetë atë dëmtim. Mendoj se është zgjedhja e duhur për të kaluar te Fulhami”.
Anësori më në formë? “Jam në formë shumë të mirë, Asani apo edhe Muçi iu fillon kampionati pak me vonesë. Asani është i paprekshëm në rolin e tij, ka meritë të madhe te kualifikimi. Shpresoj që lojtarët të jenë në formë dhe trajneri të marrë ata që e meritojnë. Besoj se trajneri e ka në kokë përzgjedhjen në masën 90%, por mbetet për t’u parë”.
Krahasimi me 2016-tën në Europianin e Francës? “Skuadra e De Biasit kishte më shumë grint dhe grup, tani ka më shumë kualitet”.
A ke kontaktuar me Manajn? “Flas me të gjithë çunat. Me sulmuesit e kam mirë muhabetin, me Brojën, Uzunin. Manaj jo vetëm që po shënon, por edhe luan mirë. Cikalleshi gjithashtu, pavarësisht se Konyaspor po kalon një formë jo të mirë. Sulmuesit më në formë janë Cikalleshi, Manaj dhe Uzuni. Pastaj Daku me Rubin Kazan është në fazë përgatitore”.
Sa beson se do të jesh pjesë e listës së Sylvinhos nga 1 në 10? “Besoj, tre apo katër”.
