Skënderbeu u mposht nga Teuta në Durrës, me korçarët që pësojnë 3 gola në pjesën e parë të ndeshjesh.
Një humbje që sigurisht që “dhemb” për “ujqërit e dëborës” pasi largohen nga “Final Four” dhe tashmë rrezikon edhe zonën e ftohtë.
Pas ndeshjes, trajneri i skuadrës Ivan Gvozdenoviç, ka pranuar se skuadra e tij nuk ishte psikologjikisht gati në ndeshjen kundër Teutës dhe për këtë ai fajësoi veten.
“Sot Teuta ishte një skuadër më e mirë dhe i uroj për fitoren. Ne e nisëm ndeshjen mirë, kishte raste nga Rashica e Nikaj, por prapë me topin e gjatë nuk mund të fitojmë asgjë kur kemi Frenklin si sulmues i parë. Vjen goli nga goditja standarte, nuk ishim agresiv, ndoshta nuk ishte penallti, është mendim im.
Ishte shumë e vështirë, e provuam në të gjitha mënyrat në pjesën e dytë, edhe me Uçe me krosime nga krahët. Por kjo ishte maksimumi sot nga ne, nuk ishim mirë si ndaj Tiranës, kjo është e vërteta. Tani do mendojmë për javën tjetër se nuk kemi kohë, por sot Teuta ishte skuadra më e mirë.
Ndoshta psikologjikisht nuk ishim gati sot, se ky është gabimi im si trajner se pas një fitore si ndaj Tiranës. Duhej të bënim më mirë, nuk përshtatëm në fushë, nuk ishim shumë larg nga topi i dytë, nuk ishim agresivë, në ajër nuk ishim mirë. Ishte gabim si nga stafi dhe nga unë si trajner”, tha Gvozdenoviç pas humbjes në Durrës.
