Komisionin i Prokurorimeve Publike urdhëroi disa muaj më parë anulimin e tenderit me vlerë 7.4 milion euro për trajtimin e mbetjeve nga të katërta spitalet e vendit, vendim i cili shpalosi dhe vendimmarrjen e çuditshme të Ministrisë së Shëndetësisë në lidhje me përcaktimin e kapaciteteve teknike të kompanive në garë. Ky vendim i KPP-së solli në vëmendjen e mediave, kompanitë që fitojnë ternderat për menaxhimin e mbetjeve spitalore.
Ditën e djeshme, emisioni “Stop” denoncoi se shoqëria “V.A.L.E RECYCLING”, e cila është kompania që ka bërë ankesën në KPP që solli edhe anulimin e tenderit, prej vitesh fiton tendera për mbetjet spitalore, por në fakt i mungon pajisja ECONOS, që djegë këto mbetje. Duke iu referuar të dhënave që vetë kompania ka deklaruar, “Stop” ka identifikuar një faturë e cila tregon blerjen e një pajisjeje djegie të ardhur nga Kina dhe jo Italia, vendi ku ai prodhohet.
Por, të dhënat e emisioni “Stop” janë përgënjeshtruar ditën e sotme nga vetë shoqëria “V.A.L.E RECYCLING” shpk., e cila në një reagim për mediat sqaron se fatura e paraqitur në emision nuk është e një autoklave por e një inceneratori që është blerë në Kinë. Sipas kompanisë, shoqëria ka 2 impiantë të tjerë për trajtimin e mbetjeve spitalore.
“Pretendimi i parë i këtij emisioni është se V.A.L.E Recycling shpk, nuk disponon autoklavën tip ECONOS, duke u paraqitur, nga ky emision një fatura e një inceneritori (i cili është transportuar nga Kina dhe nuk është autoklavë). Autoklava objekt emisioni nuk është blerë me faturë tatimore nga shitësi i intervistuar por është zhdoganuar. Sqarojmë se kjo shoqëri nuk disponon vetëm ketë autoklavë por disponon dhe 2 impiante të tjera autoklavë apo sterilizator për trajtimin e mbetjeve spitalore të modelit tip NEWSTER NW15. Impianti ECONOS është fiks si ai i treguar nga video ilustrative të emisionit, dhe jo ai që quhet “KAZANI”.” – thuhet në reagimin e kompanisë.
Më tej, kompania sqaron se nuk është ndëshkuar nga Agjencia Kombëtare e Mjedisit, pasi në inspektimin e fundit, në procesverbal nuk është konstatuar asnjë shkelje, ndërsa në lidhje me kallëzimin në SPAK të tenderit me vlerë 7.3 mln euro, kompania bën me dije se nuk kanë qenë përfaqësuesit e saj kallëzues dhe as të thirrur për këtë çështje.
“Gjithashtu, nga emisioni STOP pretendohet se jemi penalizuar nga AKM sepse nuk kemi pajisjen ECONOS, përsëri ky emision është shumë larg të së vërtetës, në procesverbalin e kontrollit dhe në Vendimin e marrë pas kontrollit të ushtruar nuk u konstatuan shkelje. Në emisionet e mëparshme të transmetuara nga Emisioni STOP dhe nga pretendimet se ka zbuluar të vërtetën se pse mbetjetet hidhen në koshat e mbetjeve spitalore, e ftojme këtë emision të shikoje se cilët kanë kontraktore në emisionet të publikuara nga vete ato.
Po ashtu nga emisioni STOP pretendohet se shoqëria V.A.L.E Recycling ka bërë kallëzim pranë SPAK. Ju informojmë se dhe për këtë pikë emisioni STOP s´ka investiguar sepse ky kallëzim nuk është bërë nga kjo shoqëri dhe as nuk është thirrur në prokurori në asnjë rast për këtë çështje. E vërteta është se nga shoqeria V.A.L.E Recycling është bërë ankimim pranë Komisionit të Prokurimit Publik, duke qënë se kushtet për pjesmarrje në tenderin e përmendur nga emisioni favorizonin një shoqëri të caktuar duke përjashtuar tre shoqëritë e tjera nga gara.” thuhet në reagimin e kompanisë.