Ish-numri dy i qeverisë Arben Ahmetaj akuzoi ish shefin e tij politik Edi Rama se ka gisht në urdhër-arrestin e nxjerrë ndaj tij nga SPAK në procedimin penal që nisi si derivat e dosjes së inceneratorëve.
Në një intervistë për emisionin “Çim Peka Live” transmetuar këtë të enjte, ai theksoi se Rama e përdori si “kokë turku”, megjithatë shtoi se “nuk bëhem kokë turku për Rdi Ramën”.
Ahmetaj tha më tej se është goditur nga media të paguara nga inceneratorët, duke përmendur këtu Top Channel. Ish-ministri i Financave tha se këto sulme kanë ardhur kur televizioni kishte procesin për pronësinë në Gjykatën e Lartë. Dhe sipas tij, pas sulmeve qëndronte kryeministri Edi Rama.
Lidhur me inceneratorin e Tiranës, u shpreh se “po të hetohet do goditen lart në maksimum”. Ai vlerësoi se pronari faktik i inceneratorit të Tiranës është kryebashkiaku i kryeqytetit Erion Veliaj.
Ish-ministri i Financave ka mohuar zërat se ka qenë ai që i ka dorëzuar Ilir Metës dokumente për inceneratorët.
Ai deklaroi se këto zëra i kanë nxjerrë Erion Veliaj dhe Belinda Balluku. “S’besoj se Rama e ka besuar, e ka besuar Lefter koka dhe Mirel Mëriti”, tha Ahmetaj.
Më tej, ai shtoi se Rama ka përdorur këtë ndaj tij “për të gjetur një person për ti vënë tap çështjes së inceneratorëve”.
Ahmetaj theksoi se është kërcënuar disa herë.
“Kam marrë 3 kërcënime nga njerëz të panjohur. Një kërcënim ishte me telefon nga burgu, dy janë kërcënime fizike të drejtpërdrejta, një kërcënim është bërë ndaj bashkëjetueses sime, kur ndodhej me fëmijën te liqeni. Çfarë do të bëja unë?”, tha.
Ai deklaroi se këto kërcënime i ka ndarë me shërbimet sekrete dhe diplomatët, ndërsa i konsideroi si sulme të motivuara politikisht në një kohë kur Rama, sipas tij, përbetohej se “do e çonte në të sëmës”.
Gjatë intervistës, Ahmetaj u shpreh se, ekoparku në Durrës është e familjarëve të Edi Ramës, ndërsa për “Portin e Durrësit”, tha se se nuk do të kishte zgjedhur formulën që ka zgjedhur Edi Rama me Alabar, por tjetër.
