Manuel Neuer, portieri dhe kapiteni i Bayern Munich, ka bërë disa deklarata që po bëjnë shumë zhurmë në Gjermani.
Portieri bavarez nuk ka hezituar të bëjë të qartë se Jürgen Klopp, trajneri i Liverpool-it, i cili ka shpallur fundin e kohës së tij në “Anfield”, në fund të sezonit, është trajner që do të përshtatej në mënyrë perfekte në “Allianz Arena”.
Kujtojmë se kampioni i Bundesligës drejtohet nga Thomas Tuchel, kontrata e të cilit në Mynih skadon në vitin 2025.
Gjatë vizitës në një klub tifozësh të Bayernit, portieri Neuer u pyet për Klopp dhe theksoi se e konsideron atë një “kandidat” për stolin e 6 herë kampionëve të Europës. “Do të varet nga ai, por nuk mendoj se Bayerni ka asgjë kundër”, – ishin fjalët e portierit për Klopp, të cilin e cilësoi si “një trajner i njohur, shumë i mirë, me përvojë, i aftë taktikisht dhe që ngjall shumë respekt tek të gjithë futbollistët e sportistët. Mendoj se është, pa dyshim, një kandidat që mund të punojë edhe te Bayern Munich më vonë”.
Sigurisht, gjithçka do të varej nga planet e vetë Klopp. “Dëshironi ta bëni apo jo, varet nga ju. Ndoshta doni të bëni një pushim së pari, ndoshta nuk dëshironi të merreni më me stërvitjen përditshme. E imagjinoj atë edhe si trajner të kombëtares një ditë. Para së gjithash, sigurisht, varet nga ai”, – theksoi Neuer për trajnerin që fitoi një Ligë të Kampionëve, një Ligë të Evropës, një Botëror për Klube, një Premier League, një “FA Cup”, një “Community Shield” dhe një Kupë EFL gjatë 9 sezoneve të tij në krye të Liverpool-it.
Tuchel nga ana e tij ka shkaktuar polemika në Gjermani, duke treguar se një nga ëndrrat e tij është të drejtojë një ekip spanjoll në të ardhmen: “Lëvizja jashtë vendit është diçka që vazhdon të më tërheqë mua, Spanja ka një ligë të jashtëzakonshme.
Nga këndvështrimi im dhe bazuar në përvojën duke punuar me lojtarët spanjollë, ata karakterizohen nga vetëbesimi i madh. Kur flet me lojtarët spanjollë, kam menjëherë ndjenjën se po i drejtohesh drejtpërdrejt personit”.
