Sëmundja e zgjebes, sikurse njihet në gjuhën popullore është rishfaqur në vendin tonë, ose e thënë ndryshe ka një shtim të rasteve në radhët e të prekurve.
Sipas bluzave të bardha ditët e fundit ka pasur një shtim të rasteve të diagnostikuar me këtë sëmundje.
Mjekja dermatologe Vjoleta Dajçi tregoi se zgjebja nuk është më një infeksion i lëkurës që lidhet vetëm me higjienën madje prek më shumë ata që kanë higjienë të tepërt.
Kjo sipas saj pasi në kohët tona njerëzit lëvizin shumë më tepër dhe kanë më shumë kontakte fizike me njëri tjetrin.
“Nuk është më vetëm me njerëzit që u mungon higjiena, madje janë më të shumta rastet në njerëz që kanë një higjienë të shtuar. Ndodh sepse edhe lëvizja dhe kontakti është shumë më i shtuar se ai që kishim shumë vite më parë kur njerëzit kishin më pak kontakte fizike. Në periudhën e COVID ka pasur më pak ose aspak raste se distanca dhe kujdesi i shtuar ka mbajtur larg shumë sëmundje infektive”, tha mjekja në ‘Euronews Albania’.
