Partia Socialiste ka kërkuar përjashtimin nga aktivitetet parlamentare të 19 deputetëve të Partisë Demokratike, duke i konsideruar përgjegjës për tensionet e shkaktuara në seancën e fundit plenare dhe tek komisioni i Reformës Zgjedhore.
Më konkretisht kërkohet marrja e mases disiplinore ndaj deputeteve: Albana Vokshi, Sorina Koti, Elda Hoti, Lindita Metaliaj, Isuf Cela, Tritan Shehu, Lefter Geshtenja, Helidon Bushati, Xhelal Mziu, Edmond Spaho, Oerd Bylykhashi, Ervin Salianji, Saimir Korreshi, Kasem Mahmutaj, Ramadan Likaj. Kastriot Piroli, Qani Xhafa, Lodovik Hasani, dhe Luan Baçi.
Kërkesa është firmosur nga 7 deputetë socialistë, të cilët në arsyetimin e tyre theksojnë se deputeti Ervin Salianji mbante një zhurmues në dorë në seancën e fundit në Kuvend, duke moslejuar normalitetin në sallë, ndërsa deputetët e tjerë bllokuan foltoren dhe shkaktuan zhurmë në sallë.
Sa i përket komisionit të Reformës Zgjedhore theksohet se deputetet Albana Vokshi dhe Lindita Metaliaj kanë zënë vendet e bashkëkryetarëve si dhe u janë drejtuar me tone të larta deputetëve socialistë.
Mesa duket, me këtë kërkesë mazhoranca kërkon ta lërë Kuvendin pa opozitë, pasi me rregulloren e re të miratuar në mënyrë të njëanshme prej tyre, përjashtimet janë me 30 ose 60 ditë nga aktivitetet parlamentare.
Opozita prej rreth 3 muaj ka ndërmarrë aksionin për të bllokuar të gjitha aktivitetet parlamentare, deri në plotësimin e kërkesave të tyre, të cilat i konsiderojnë si kushtetuese, për ngritjen e komisioneve hetimore dhe ndryshimin e anëtarëve të opozitës në komisionin e posaçëm të reformës zgjedhore.
