Kryeministri i Kosovës, Albin Kurti i ka shprehur me anë të një postimi në Facebook urimet e tij kryeministrit të qeverisë së përkohshme në Maqedoninë e veriut Talat Xhaferit.
Në urimin e tij kryeministri i Kosovës ka shprehur sigurinë se nën drejtimin e Xhaferit, do të kemi një Maqedoni të veriut me orientim të fortë euroatlantik dhe larg fijeve të Moskës. Gjithashtu ai shprehu se do të vazhdojë rrugën e bashkëpunimit ndërqeveritar edhe me homologun zXhaferi, ashtu siç ka ndodhur edhe me paraardhësin e tij, Kovaçevski.
“Ish-Kryetarit të Kuvendit të Maqedonisë së Veriut, z. Talat Xhaferi dëshiroj t’i uroj suksese për detyrën e tij të re, atë të kryeministrit në qeverinë teknike e cila pas tre muajsh do ta çojë në zgjedhje vendin tonë fqinj e partner. Miqësia dhe bashkërendimi për projekte të përbashkëta uroj të jenë shënjues të dy qeverive tona gjatë qeverisjes Xhaferi.
Një Maqedoni e Veriut me orientim të fortë euroatlantik, partnere e Prishtinës dhe e perëndimit dhe sa më larg Moskës e fijeve të saj, një Maqedoni e Veriut që promovon vlerat e bashkëjetesës dhe lufton diskriminimin etnik, është ajo që dëshirojmë. Për këto synime e për plot bashkëpunime të tjera, jam i sigurt se do të vazhdojmë rrugën e bashkëpunimit ndërqeveritar edhe me homologun z.Xhaferi, ashtu siç ka ndodhur edhe me paraardhësin e tij, z. Kovaçevski, të cilin e përgëzoj për vlerat që reflektoi gjatë drejtimit të tij”,-tha shkruar Kurti.
