Kryetari i Gjykatës së Lartë, Sokol Sadushi u shfaq disa më parë duke pozuar krah zyrtarëve të lartë socialistë, me rastin e 80-vjetorit të krijimit të Brigadës së Pestë. Në qafë mbante një shall të kuq – simbol i sistemit të egër të komunizmit në Shqipëri, që vrau, torturoi dhe burgosi mijëra të pafajshëm.
Në një reagim këtë të enjte, Sadushi rreket të justifikohet duke u shprehur se shalli i kuq nuk simbolizon komunizmin, por luftën antifashiste.
Ai thotë se në aktivitet “u ftua me cilësinë e pjesëtarit të familjes së një prej themeluesve të kësaj brigade, babait tim Maliq Sadushi”, ndërsa pretendon se pjesëmarrja në aktivitet nuk mund të cilësohet si angazhim politik.
“Pjesëmarrja në një veprimtari përkujtimore të Luftës Antifashiste, e cila nderohet sot në të gjithë botën demokratike, nuk cilësohet si angazhim në një aktivitet politik, e aq më pak të identifikueshëm me një parti të caktuar politike në Shqipëri. Unë ndjehem plotësisht i përgjegjshëm dhe i përkushtuar ndaj detyrimeve të mia si gjyqtar dhe si qytetar, pjesë e të cilave është dhe mirënjohja për sakrificat që populli shqiptar bëri gjatë Luftës së Dytë Botërore. Një sjellje e ndryshme nga ana ime, nëpërmjet mohimit të historisë së vendit dhe asaj familjare, do të duhej të shkaktonte më shumë shqetësim për personalitetin e gjyqtarit, sesa pjesëmarrja në aktivitetin që bëhet në nderim të luftës dhe kontributit të babait tim, të bashkëluftëtarëve të tij dhe të gjithë dëshmorëve të atdheut”, shprehet Sadushi.
Lexo edhe:
Hipokrizia/ Sadushi me shall të kuq komunist gjykon ish-të përndjekurit e Enver Hoxhës
