Gjykata e Posaçme dënoi këtë të enjte me 9 muaj burgim kreun e bashkisë së Kuçovës, Kreshnik Hajdari, për akuzën falsifikim i vulave, stampave ose formularëve, më shumë se një herë. Për shkak të gjykimit të shkurtuar dënimi u ul në 6 muaj burgim dhe në aplikim të nenit 63 të Kodit Penal, gjyqtarja Elsa Ulliri vendosi dënimin përfundimtar të Hajdarit me 150 orë punë në interes publik.
Prokuroria kishte kërkuar dënimin e Hajdarit me 1 vit burgim dhe konvertim e dënimit me punë publike për veprën penale të “Falsifikimi i vulave, i stampave ose i formularëve”, më shumë se një herë – që sipas Kodit Penal parashikon një dënim nga gjashtë muaj deri në pesë vjet burgim.
Vendimi duket se i shkon për shtat Hajdarit, që nga njëra anë e mban jashtë burgut dhe nga ana tjetër i shpëton mandain. Sipas ligjit të dekriminalizimit, nëse do të ishte dënuar me një vendim të formës së prerë me më shumë se 6 muaj burgim, Hajdari do të humbte mandatin e kryebashkiakut.
Pas seancës, në një prononcim për gazetarët, avokati i tij, Theodhori Sollaku paralajmëroi ankim të vendimit të shkallës së parë.
Në Nëntor 2023, Hajdari u mor i pandehur nga Prokuroria e Posaçme për akuzën e “falsifikimit të formularëve”, pas një kallëzimi po nga opozita lidhur me fshehjen e një dënimi në Greqi në formularin e vetdeklarimi. Kreshnik Hajdari kandidoi për kryetar bashkie në Kuçovë në zgjedhjet e qershorit 2019, si dhe në lokalet e fundit – 14 maj 2023. Në të dyja rastet, në formularin e vetëdeklarimit, ka pohuar se nuk ka qenë ndonjëherë në hetim ose gjykim nga një autoritet i huaj, për kryerjen e një vepre penale, si dhe nuk ka qenë ndonjëherë i dënuar me vendim të formës së prerë nga një autoritet gjyqësor shqiptar ose i huaj. Megjithatë, komunikimi i autoriteteve shqiptare me ato greke ka zbuluar të kundërtën.
Fshehja e dënimit
Prokuroria e Përgjithshme njoftoi zyrtarisht Komisionin Qendror të Zgjedhjeve më 2 nëntor të këtij viti se Hajdari është dënuar me 4 muaj burgim nga Gjykata e Janinës në vitin 1999, për shkelje të paligjshme të kufirit. Të dhënat e autoriteteve greke tregojnë se dënimi i dhënë për Kreshnik Hajdarin, në atë kohë 17 vjeç, ishte konvertuar në gjobë që llogaritej në shumën 1500 dhrami për çdo ditë burgu. Procesi gjyqësor në Gjykatën e Janinës rezulton të jetë ndjekur personalisht nga Kreshnik Hajdari dhe ai është deportuar menjëherë pas përfundimit të procesit gjyqësor.
Kreshnik Hajdari ka pasur detyrimin ligjor për t’i deklaruar këto të dhëna në formularin e “Dekriminalizimit”, në momentin kur ai vendosi të kandidojë për drejtimin e Bashkisë së Kuçovës, në Mars të vitit 2023, si dhe në zgjedhjet paraardhëse. Por, siç rezulton nga formulari që i dorëzuar në KQZ, Hajdari nuk ka deklaruar faktin që është dënuar penalisht dhe është deportuar, ndërkohë që ka pasur dijeni, si për vendimin e gjykatës, ashtu edhe vendimin e autoriteteve policore për deportimin e tij nga Greqia në drejtim të Shqipërisë.
Ligji “Për garantimin e integritetit të personave që zgjidhen, emërohen ose ushtrojnë funksione publike”, i njohur si “Ligji i Dekriminalizimit”, u miratua në vitin 2015. Ai mbështetet në, më së paku dy shtylla kryesore; detyrimin e zyrtarëve për të deklaruar çdo lloj vendimi dënimi penal, edhe në rastet kur ato janë shuar, parashkruar apo rehabilituar; si edhe ndalimin për të qenë pjesë e administratës e çdo personi të dënuar me një vendim penal me burgim mbi 6 muaj. Dënimi i dhënë nga Gjykata e Janinës me 4 muaj burgim duket se nuk duhet të përbënte kriter ndalues për zgjedhjen e Kreshnik Hajdarit në postin e kryetarit të Bashkisë së Kuçovës. Por, ai rezulton se nuk e ka deklaruar aspak dënimin penal, si edhe fakti që është deportuar nga Greqia, duke e vendosur veten në pozitën e personit që ka kryer veprën penale të “Falsifikimit të formularëve, vulave, stampave ose formularëve”.
Lidhur me fshehjen e dënimit, SPAK e mori të pandehur, ndërsa kreu i KQZ Ilirjan Celibashi vlerësoi se nuk ka arsye ligjore që Kreshnik Hajdarit t’i ndërpritet mandati i kryebashkiakut të Kuçovës. Vendimi u ankimua nga opozitari Lefter Maliqi, ndërsa Komisioni i Ankimimeve dhe Sanksioneve vendosi kthimin e shqyrtimit të kërkesës për shkarkimin e Hajdarit në Komisionin Qendror të Zgjedhjeve.
Ndërkohë, në SPAK, ndaj Hajdarit janë depozituar disa kallëzime për çështje të ndryshme.
