Kush do ta mendonte që një selfie mund të na tregonte nëse duhet të bëjmë një vizitë te mjeku okulist apo jo. Në fund të fundit, me ndihmën e inteligjencës artificiale mund të bëhet gjithçka.
Dy studentë të diplomës “Master në Bioinformatikë dhe Biostatistikë” në Universitat Oberta de Catalunya (UOC) kanë krijuar një aplikacion celular të aftë për të zbuluar në pak sekonda nëse dikush vuan nga glaukoma, retinopatia diabetike ose katarakti, tre nga më të zakonshmet në botë që shkaktojnë humbjen e shikimit.
Inteligjenca artificiale analizon një selfie dhe nxjerr një diagnozë, e cila nëse është pozitive, e drejton personin drejt specialistit më të përshtatshëm mjekësor. Sipas Organizatës Botërore të Shëndetësisë (OBSH), rreth 2.2 miliardë njerëz në mbarë botën vuajnë nga një lloj dëmtimi i shikimit ose verbëria. Gjysma e këtyre rasteve mund të parandalohet me diagnozë të hershme. Kjo është arsyeja e krijimit të projektit BegIA (begia do të thotë ‘sy’ në gjuhën baske).
“Ideja për BegIA erdhi nga një përvojë personale. Një i afërm që vuante nga diabeti i tipit 2 filloi të humbasë një pjesë të madhe të shikimit, deri në atë pikë sa nuk mund të drejtonte më makinën ose të lexonte,” shpjeguan Igor García Atutxa dhe Francisca Villanueva.
“Atij iu zhvillua retinopatia diabetike, një sëmundje e syve që shkakton humbje të shikimit dhe ndikimi i së cilës mund të reduktohet me diagnozën e hershme”, shtuan ata.
