Deputeti i PD Luan Baçi ka folur në “MCN” mbi protestën e fundit të fermerëve kundër rënies së çmimit të qumështit. Ai tha se nuk ka konflikt mes fermerëve dhe përpunuesve të qumështit, por qeveria duhet të ndërhyjë me subvencione, në mënyrë që sektori të mos falimentojë.
Ndër të tjera deputeti demokrat ndau një informacion, duke pretenduar se tregtarë serbë po blejnë delet e racës në Shqipëri, dhe shtoi se në Shqipëri po shpopullohet jo vetëm popullsia, por edhe blegtoria.
“Është mungesa e subvencioneve dhe e vëmendjes së qeverisë shqiptare. Qeveria gjithmonë është tregtuar indiferente ndaj kërkesave. Vet fermerët e organizuar kanë dalë dje në Urën e Kardhiqit dhe kanë protestuar. Dje kanë dalë në Levan qindra fermerë në mënyrë të pavarur, duke bërë një bllokim formal të rrugës për të tërhequr vëmendjen e qeverisë. Por qeveria lëshoi policinë si një lukuni larosh. Madje ka marrë protestues dhe i ka çuar në Komisariat. Një turp i vërtetë për drejtuesit e lartë të Policisë së Fierit. I kanë marrë tre orë pasi ka përfunduar protesta. Në mënyrë të qëllimte dhe selektive, që kanë marrë informacion që janë mbështetës të PD. Qeveria vepron si grevëthyes. Do bëjë ministrja një takim të fshehtë me disa fermerë, për t’i përçarë. Sot kam marrë vesh në bisedë me disa fermerë që shumë nga tregtarët serbë kanë zbritur në Shqipëri ku po blejnë delet e racës, po i marrin me kamionë dhe po i çojnë në Serbi. Po e shpopullojnë jo vetëm popullsinë, por edhe blegtorinë. Këtë duhet të shohë ministria e Bujqësisë. Duhet të ketë subvencione. Subvencionet në Kosovë, Malin e Zi, janë tre herë më të larta. Çmimet i vendos tregu. Përpunuesve s’duhet t’u biem më qafë. Përpunuesit dhe fermerët janë partnerë me njëri-tjetrin. E rregullojnë çmimin me anë të tregut. Shteti duhet të ndërhyjë vetëm duke subvencionuar fermerin. Ndryshe do ketë falimentim total. Çmimi këtu bie sepse të gjithë bulmetrat që hyjnë nga vendet e rajonit janë me çmim shumë të ulët. S’ka një konflikt mes përpunuesve dhe prodhuesve, por ka mosdhënie subvencioni nga qeveria” – u shpreh Luan Baçi.
