Një aksident ka ndodhur në Lushnje mesditën e kësaj të marte. Një automjet tip “Audi” i drejtuar nga një 23-vjeçar është përplasur me një automjet tjetër tip “Fiat” me drejtues një 51-vjeçar.
Mësohet se shoferi i “Audit” ishte në gjendje të dehur dhe si rezultat është arrestuar nga policia. Ndërkohë 51-vjeçari është dërguar në spital, pasi ka pësuar dëmtime të lehta. Raportohet se ndodhet jashtë rrezikut për jetën.
“Specialistët e Sektorit të Policisë Rrugore të DVP Fier arrestuan në flagrancë shtetasin:
-S. M., 23 vjeç, banues në Lushnjë, pasi me automjetin tip “Audi”, që e drejtonte në gjendje të dehur, ka përplasur automjetin tip “Fiat” me drejtues shtetasin A. V., 51 vjeç, i cili është dëmtuar dhe ndodhet në spital, në kujdesin e mjekëve”,- njofton Policia.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Fier, për veprime të mëtejshme.
