Liderët e Ballkanit Perëndimor dhe përfaqësuesve të lartë të administratës amerikane e të BE-së, janë mbledhur mbrëmjen e sotme në Shkup për të marrë pjesë ditën e nesërm në punimet e konferencës së Bashkimit Evropian për rritje ekonomike të rajonit.
Bëhet fjalë për konferencën “Plani i Rritjes së Ballkanit Perëndimor dhe Integrimi më i Shpejtë në BE”, ku mikëpritësi do të jetë kryeministri maqedonas, Dimitar Kovaçevski.
Kryeministri Edi Rama ka ndarë në rrjetet sociale disa foto nga darka e sotme, ku ajo që bie në sy është prania dhe e Alex Soros, djali i George Soros, i cili shfaqet në krah të kreut të qeverisë shqiptare. Të pranishëm janë dhe presidenti serb Aleksandër Vuçiç apo kryeministri i Kosovës, Albin Kurti.
“Shkup – Përpara darkës së punës mes liderëve të Ballkanit Perëndimor dhe përfaqësuesve të lartë të administratës amerikane e të BE”– shkruan Rama.
Plani i BE-së për Ballkanin Perëndimor synon rritjen ekonomike të rajonit, përshpejtimin e reformave të duhura, dhe kryerjen e investimeve, që mund të avancojnë procesin e zgjerimit të BE-së me këto vende.
Vlera e ndarë nga BE-ja për këtë plan, në periudhën 2024-2027, është 6 miliardë euro. Pagesat është thënë se do të ekzekutohen vetëm pas përmbushjes së reformave të diskutuara.
