Kryetari i Partisë së Lirisë, Ilir Meta, në një konferencë për mediat, zbuloi se i ka shprehur solidaritet të plotë ish-kryeministrit Sali Berisha i cili po vuan dënimin e arrestit në shtëpi. Meta tregoi se është përshëndetur me Berishën para disa ditësh, ndërsa e cilësoi masën ndaj tij si një përndjekje politike.
“Jemi përshëndetur para disa ditësh, i kam shprehur solidaritetin tim të plotë. Është një përndjekje politike dhe përpjekje për të minuar opozitarizmin në vendin tonë. Këto imponohen nga Rama përmes sistemit të drejtësisë dhe përmes presioneve që ushtron në këtë drejtim”, tha Meta.
I pyetur lidhur me qëndrimin e Partisë së Lirisë për reformën zgjedhore, Meta tha se PL mbetet e hapur për gjithçka që garanton integritetin e zgjedhjeve, barazinë e votës, të drejtën e votimit për emigrantët.
“Jemi shumë të qartë sa i takon reformës zgjedhore, që së pari Rama s’ka interes për reformë zgjedhore se nuk ka interes për zgjedhje të lira. PL mbetet e hapur për gjithçka garanton integritetin e zgjedhjeve, barazinë e votës, të drejtën e votimit për emigrantët”, u shpreh Meta.
