Nga Boldnews.al
Brenda një kohe të shkurtër, Struktura e Posaçme Anti-Korrupsion (SPAK) merr dy dekorata fshikulluese nga autoritetet e rëndësishme ndërkombëtare për cënimin flagrant të lirisë së medias.
Në fillim, Gjykata e Strasburgut urdhëroi Prokurorinë dhe Gjykatën e Posaçme që të shfuqizonin menjëherë urdhërin për sekuestrimin e serverit të redaksisë së “Lapsi-t”, pas publikimit të listës së Patronazhistëve të Partisë Socialiste.
Së fundmi, edhe Komiteti (Gjykata) e të Drejtave të Njeriut i Organizatës së Kombeve të Bashkuara (OKB) ka marrë një vendim, në bazë të të cilit “SPAK detyrohet të mos prekë dhe të mos hapë apo qoftë dhe të ekspertojë paisjet e punës, familjare dhe dokumentat e sekuestruara tek banesa, makina dhe të vendi i punës i gazetarit Elton Qyno”.
Në 4 vitet e funksionimit të tij, SPAK-u, si asnjëherë në historinë e pluralizimit, e ka vendosur prokurorinë shqiptare në një “listë të errët” të institucioneve ndërkombëtare. Dhe, në të dy rastet, shkak janë bërë veprimet abuzive ndaj medias dhe gazetarëve.
SPAK u krijua si njësia elitë e luftës kundër krimit të organizuar dhe korrupsionit në nivele të larta. Megjithëse rezultatet e saj janë shpesh pjesë e debatit publik, sidomos për “prapavijë politike” dhe “tolerim të tepruar e hetime gjysmake”, sërish prokurorët e kësaj strukture miklohen pafundësisht nga “ndërkombëtarët e Tiranës”.
Çdo kritikë ndaj SPAK-ut shoqërohet me reagim mbrojtës të ambasadave kryesore në kryeqytetin shqiptar.
Çdo pakënaqësi mbi punën e pamjaftueshme dhe, me raste, edhe me standarde të shumëfishta të prokurorëve të posaçëm, përballet me reagimin ambasadorial, duke i konsideruar anëtarët e asaj trupe si “heronjtë e fëmijëve tanë”.
Struktura e Posaçme Anti-Korrupsion është guri i kurorës së Reformës në Drejtësi, për të cilën thuhet se partnerët ndërkombëtarë kanë shpenzuar rreth 100 milionë dollarë për të vënë në “urdu këtë pis milet” në një cep të Ballkanit.
Natyrisht, fatura 100 milionë dollarëshe, e shpërndarë më së shumti tek ekspertët e huaj që kontribuuan në Reformën në Drejtësi, duhet justifikuar në raportet e ambasadave për kancelaritë e tyre.
“SPAK po ecën shumë mirë….”, “SPAK po bën histori…”. “Pandëshkueshmërisë për i vjen fundi në Shqipëri…”, gjenden rëndon në paragrafët që selitë diplomatike në Tiranë përcjellin tek shefat e tyre.
Përballë këtij “suksesi”, SPAK, e pas tij edhe Gjykata e Posaçme, ndihet shumë i lirshëm që të ndërhyjë dhunshëm në lirinë e medias dhe të gazetarëve.
Kolegu Elton Qyno publikoi akte nga dosja hetimore e njohur si “SKY ECC”. SPAK u shqetësua dhe nisi hetim për nxjerrje sekreti hetimor. U kontrollua Qyno personalisht e familjarisht, duke tronditur bashkëshorten dhe fëmijët e mitur, për të zbuluar se cili është burimi i gazetarit.
Hetimi për Qynon po zhvillohet nga prokurori Behar Dibra, i cili është gjithashtu prokurori për hetimin e “SKY ECC”.
Ky Behar, i cili duhet të jetë vetë nën hetim, si një prej personave që ka aksesin mbi dokumentat hetimorë, ushtroi terror psikologjik mbi gazetarin për të zbuluar se cili është burimi i Qynos.
SPAK po tregon se e ka më të lehtë të hetojë gazetarët për nxjerrje sekreti, se sa të shoh brenda gardhit të vetë për “burimin” e informacionit.
SPAK-u ka “të drejtë” të tregohet i fortë me gazetarët. Ka mbështetje të pakufizuar ndërkombëtare dhe, mesa duket i jep vetes të drejtë të veprojë si të dojë.
E, mbi këtë qasje aspak normale, prokurorëve duhet t’u mpihen dhëmbët nga shuplakat e atyre institucioneve prestigjioze ndërkombëtare, si Gjykata e Strasburgut apo ajo e OKB-së, të cilat nuk kanë ndarë “milionat e Reformës” dhe i shohin zhvillimet negative në Shqipëri ashtu siç janë në realitet.
