Është ekzekutuar në një atentat mafioz prokurori César Suarez, i cili po hetonte aktin kriminal të regjistruar ndaj një televizioni, pak kohë më parë në Ekuador.
Ngjarja ka ndodhur pasditen e të mërkurës në qytetin Guayaquil, teksa ende nuk është e qartë nëse vrasja e Suarez ka lidhje me hetimet që po kryente për sulmin në stacionin televiziv. Mediat lokale raportojnë se prokurori u qëllua teksa po shkonte pranë zyrës së tij.
Në një intervistë për gazetën “El Universo” një ditë para vdekjes së tij, Suarez tha se atij nuk i ishte dhënë mbrojtje policore pavarësisht se kishte marrë në pyetje 13 personat e arrestuar pas sulmit në stacionin televiziv.
Vrasja e tij është e fundit në një mori incidentesh të dhunshme në të gjithë Ekuadorin pas arratisjes së dy bosëve të bandave kriminale nga burgu, qindra rojeve të burgut të marrë peng dhe shpërthime në disa qytete.
“Kriminelët, terroristët, nuk do të pengojnë angazhimin tonë ndaj shoqërisë ekuadoriane. U bëjmë thirrje forcave të rendit të garantojnë sigurinë e atyre që po kryejnë detyrën”, ka thënë prokurorja e përgjithshme e vendit, Diana Salazar, në një video të postuar në rrjetet sociale. Ajo ka bërë të ditur se po hetonte vrasjen e prokurorit Suarez, por nuk dha detaje të tjera.
Ekuadori është tronditur nga dhuna e madhe ditëve të fundit, duke përfshirë sulmin në studion e televizionit “TC” në Guayaquil, marrjen peng të më shumë se 200 punonjësve të burgjeve, shpërthimet në disa qytete dhe rrëmbimin e oficerëve të policisë.
