Liria për të ndërtuar kulla me kate pa leje dhe më pas për të paguar “gjobën” për legalizimin e tyre vlen vetëm për oligarkët, pasi qytetarët e thjeshtë përballen menjëherë me ligjin dhe përfundojnë në komisariat.
Kjo liri veprimi u pranua edhe nga Gjykata Kushtetuese, e cila i dha “dorë të lirë” ndërtuesve të ngrenë godinat me sa kate të duan, pavarësisht lejes së marrë nga organet kompetente. Tashmë ndërtuesit do të kenë mundësi që katet e ndërtuara pa leje t’i “blejnë” te qeveria, duke i paguar me çmim tregu.
Por kjo mundësi nuk është e njëjtë për të gjithë!
Policia e Shtetit publikoi dje një njoftim ku tregonte për arrestimin e një 63 vjeçari, i cili kishte ndërtuar në Theth 3 objekte me dru, me qëllim përfitimin nga turizmi. Në foton e publikuar nga policia tregohej se efektivët kishin qenë të shpejtë dhe kishin arritur ta arrestonin 63 vjeçarin pa mundur t’i përfundonte ndërtimet.
Qytetarit nga Thethi nuk iu dha mundësia t’i legalizonte ndërtimet nëpërmjet “gjobës” qeveritare, por u arrestua me bujë dhe u bë lajm në të gjitha mediat.
Kjo mënyrë veprimi është e njëjtë për të gjithë qytetarët që nuk kanë lidhje me qeverinë dhe pushtetin, që duhet të marrin leje edhe për të hapur një dritare apo për të bërë rregullime brenda banesës së tyre, ndërkohë që kullat vijojnë të ngrihen në mes të Tiranës, duke i shtuar katet pa leje çdo ditë e më shumë.
Me sa duket, institucioneve si IKMT dhe Policisë së Shtetit “u dhemb qafa” të ngrenë kokën për të parë katet pa leje, ndërkohë që janë në gatishmëri të plotë për të gjobitur dhe arrestuar qytetarët e thjeshtë.
Por, në një vend ku edhe ligjet janë bërë posaçërisht për të mbrojtur oligarkët, të pasurit dhe të lidhurit me pushtetin, e vetmja gjë që mund të bëjmë është të raportojmë, me shpresën se një ditë do të ketë reagim ndaj këtyre fenomeneve që nuk sjellin asgjë tjetër veçse shtim të varfërisë dhe largimin e popullsisë.
