Kolegji i Posaçëm i Apelimit ka konfirmuar vendimin e Komisionit të Pavarur të Kualifikimit, për shkarkimin nga detyra të ish-gjyqtares së Gjykatës së Apelit Korçë, Etleva Temo.
Vendimi u mor këtë të mërkurë nga Trupi gjykues i Kolegjit të Posaçëm të Apelimit, i përbërë nga Albana Shtylla kryesuese, Sokol Çomo relator, Ina Rama, Natasha Mulaj, Rezarta Schuetz anëtare.
Sipas njoftimit të KPA, trupi Gjykues vendosi në mënyrë unanime të lë në fuqi vendimin e Komisionit të Pavarur të Kualifikimit, duke vulosur kështu përjashtimin e gjyqtares Temo nga sistemi.
Ish-gjyqtarja kishte kërkuar nga KPA rikthimin në detyrë, duke pretenduar se gjetjet e Komisionit të Pavarur të Kualifikimit nuk ishin të sakta, por KPA konfirmojë në mënyrë unanime atë çka kishte vendosur KPK në 12 tetor 2020.
Gjatë seancës dëgjimore të Etleva Temos u konstatuan mungesa financiare për krijimin e pasurive, deklarime të rreme, veprime fiktive në transaksionet e disa makinave si dhe konflikt interesi gjatë gjykimit të disa çështjeve.
