Policia e Shtetit bën me dije se është ekstraduar drejt Italisë 30-vjeçarit nga Lezha, Gëzim Gjini, i cili akuzohet për vrasjen e bashkëshortit të motrës së tij, Petrit Caka, ngjarje kjo e ndodhur në dhjetor të vitit 2022.
Ai u arrestua në Shqipëri, në muajin gusht të vitit 2023, në kuadër të operacionit policor ndërkombëtar “Infra Atlas”, i cili në atë periudhë zhvillohej paralelisht në disa shtete dhe koordinohej nga Sekretariati i Përgjithshëm i Interpolit në Lion.
“Ky shtetas ka qenë i shpallur në kërkim ndërkombëtar nga Interpol Roma, pasi Gjykata e Velletri, Itali, me vendimin e datës 17.07.2023, i ka caktuar masën e sigurisë “Arrest në burg”, për veprën penale “Vrasje”, për të cilën Kodi Penal i Italisë parashikon deri në 30 vjet burgim. Shtetasi Gëzim Gjini akuzohet se është organizator i vrasjes së bashkëshortit të motrës së tij, shtetasit Petrit Caka, vrasje e kryer me mjet prerës, në Rocca Priora, Itali, më datë 13.12.2022, në bashkëpunim me 2 shtetas të tjerë.” – thuhet në njoftimin e Policisë.
Historia
Gëzim së bashku me 3 persona të tjerë mes të cilëve dhe motrën e tij akuzohet për vrasjen e kunatit, Petrit Caka. Ngjarja e rëndë u regjistrua në 13 Dhjetor të 2022 në Roça Priora të Italisë.
Për të fshehur vrasjen Gëzim Gjini, e motra e tij dhe 2 bashkëpunëtorët e tjerë e inskenuan ngjarjen si grabitje, ku Caka u vra pa mëshirë, duke u goditur disa herë me thikë.
Por hetimet e autoriteteve italiane si dhe përgjimet e zhvilluara zbuluan të gjithë dinamikën e ngjarjes së rëndë. Konkretisht rezultoi se Gëzim Gjini dhe dy bashkëpunëtorët e tij ishin thirrur prej motrës së tij për të vënë në jetë planin e vrasjes. Autorët mbërritën në Itali në aeroportin e Romës më 10 Dhjetor, ndërsa vetëm 3 ditë më pas u ekzekutua Petrit Caka.
Ishte gruaja e tij që njoftoi karabinierët për ngjarjen duke deklaruar se ka gjetur në shtëpi trupin e pajetë të bashkëshortit të saj, thënie këto që rezultuan të pavërteta. Shkak për realizimin e këtij plani u bënë konfliktet e vazhdueshme mes çiftit, që shpesh herë sipas gruas kishin përfunduar me dhunimin e saj.
