Këtë të hënë do të nisë sesioni VI i Legjislaturës X së Kuvendit të Shqipërisë. Seanca e parë e këtij sesioni do të mbahet në orën 17:00.
Deputetët i kthehen punimeve të Kuvendit të Shqipërisë me një rregullore të re me përjashtim nga 30 deri në 60 ditë, të miratuar në mënyrë të njëanshme dhe në situatë të pazakontë nga mazhoranca për të goditur opozitën. Gjithsesi, pavarësisht këtyre akteve nga socialistët, deputetët e PD-së kanë paralajmëruar se do të vazhdojnë aksionin e tyre në Kuvend, deri në plotësimin e kërkesave për ngritjen e komisioneve hetimore.
Seanca do të hapet nga kryeparlamentarja Lindita Nikolla, ku pikë e parë e rendit të ditës është miratimi i dekreteve të presidentit për ndryshimet në kabinetin qeveritar, me shkarkimin e Elva Margaritit, si Ministre e Kulturës dhe Ervin Mete, si Ministër i Financave dhe Ekonomisë dhe emërimin e këtij të fundit si Ministër i Financave dhe Blendi Gonxhja si Ministër i Ekonomisë, Kulturës dhe Inovacionit.
Në seancën e sotme plenare do të mungojë kreu i PD-së, Sali Berisha, për shkak se ndodhet në “arrest shtëpie” në lidhje me çështjen e privatizimit të ish-kompleksit Partizani. Me mungesën e Berishës, në Kuvend pritet të rikthehet sot Lulzim Basha dhe grupi i tij.
Ndërkohë, disa prej ligjeve kërkojnë 84 vota që mazhoranca nuk i ka e vetme, si amnistia penale, rritja e pagave për gjyqtarët e Gjykatës Kushtetuese dhe zgjedhja e avokatit të ri të popullit, por edhe Reforma Zgjedhore. Vetëm një ditë më parë, Elisa Spiropali i bëri thirrje opozitës që të japin votat për amnistinë penale.
Ajo që mbetet me interes të shihet është dhe se si do të vazhdojë puna për reformën zgjedhore, pasi kryeministri Edi Rama deklaroi se koha e komisioneve bipartizane ka marrë fund. A do i gjejë mazhorana votat tek grupi i Bashës për nismat ligjore që presin 84 vota, kjo mbetet të shihet.
Edhe në seancën e sotme plenare pritet të mbizotërojë kaosi dhe tensioni. Ndërkohë në tre muajt e kaluar të aksiot opozitar në parlament, u përjashtuan 29 deputetë të PD-së. Gjithashtu, Flamur Noka rrezikon edhe përjashtimin 60 ditor për shkak të seancës së fundit të vitit të shkuar.
