Grupi parlamentar i Partisë Demokratike i ka kërkuar Gjykatës Kushtetuese, që seancën për marrëveshjen e emigrantëve me Italinë, ta zhvillojë të hapur për publikun.
Në shkresën drejtuar këtij institucioni dhe që mban firmën e kryetarit të grupit, Gazment Bardhi, argumentohet se seanca duhet të jetë e hapur për mediat dhe publikun, pasi mbart një rëndësi të veçantë.
Në Dhjetor, pas ankimit nga demokratët, GJK vendosi pezullimin e ratifikimit të marrëveshjes, që socialistët po bëheshin gati për ta votuar në Kuvend.
Marrëveshja Rama-Meloni, parashikon strehimin në Shqipëri të refugjatëve që kapen nga autoritetet detare italiane në Mesdhe dhe ka marrë kritika të shumta, megjithatë kryeministri Edi Rama është shprehur i vendosur për miratimin në Kuvend.
