Është duke u mbajtur ditën e sotme seanca gjyqësore në GJKKO për procesin ndaj ish-ministrit të Mbrojtjes Fatmir Mediu për çështjen e Gërdecit, ku ka dëshmuar Ylli Pinari, ish drejtori i “MEICO”, kompanisë shtetërore të shitjes së municioneve.
I shpallur fajtor në dosjen e parë “Gerdeci”, Ylli Pinari ka rrëfyer në GJKKO se si ishte vënë në kontakt me Patrik Henri, përfaqësuesin e SAC, kompania qe ishte e përfshirë në demontimin e armëve. Ai ka dëshmuar se Patrik Henri kishte krijuar në Shqipëri kompaninë Albademil ku bashkëaksioner ishte Mihal Delijorgji.
Në dëshminë e tij, Ylli Pinari ka thënë se MEICO nuk është përfshirë në procesin e përcaktimit te Gërdecit si vend demontimit.
“Meico nuk është përfshirë në procesin e përcaktimit të Gërdecit si vend demontimit. Fillimisht kemi pasur komunikime me e-mail. Pas shkëmbimit të informacionit Patriku propozoi krijimin e një linje demontimi. Për këtë çështje kam bërë 5 vite burg dhe kam pikëpyetjet e mia për këtë.”, ka thënë Pinari në GJKKO.
Patrik Henri, pronar i SAC, ishte partner me Delijorgjin, i cili ishte pronar i Alba Demil. SAC merrej me demontimin, ndërsa Alba Demil me ngritjen e infrastrukturës dhe rekrutimin e punonjësve. Patrik Henri ishte bashkëpronar me 25% të aksioneve në kompaninë Alba Demil me Delijorgjin.
