Gjykata e Lartë ka vendosur të mos e pranojë rekursin për heqjen e sekuestros për inceneratorin e Tiranës.
Kërkesa u shqyrtua në dhomën e këshillimit nga një kolegji gjykues i përbërë nga gjyqtarët Ilir Panda, Sokol Binaj, e Sandër Simoni
Avokatët e kompanisë koncesionare kërkuan heqjen e sigurimit pasuror “sekuestro preventive” për persion juridik “Integrated Energy BV S.P.V” sh.p.k së bashku me të gjitha pasuritë e paluajtshme dhe të luajtshme në pronësi të tij. Por, kërkesa e tyre është rrëzuar.
GJKKO vendosi më 28 Korrik të vitit të kaluar sekuestro preventive ndaj kompanisë “Integrated Energy B.V. S.P.V.” sh.p.k”, që është kompania koncesionare e inceneratorit të Tiranës si dhe të gjitha pasuritë e luajtshme dhe të paluajtshme të kësaj kompanie, teksa vendimi u ekzekutua më 1 gusht.
Kujtojmë se SPAK doli në konkluzione se Klodian Zoto dhe Mirel Mërtiri rezultojnë të jetë pronarët realë të kompanisë që ka përfituar koncesionin e inceneratorit të Tiranës dhe vendosi sekuestrimin e tre firmave që janë përdorur prej tyre. Zoto dhe Mërtiri kanë angazhuar persona të tjerë në ‘letra’ për të fshehur faktin se janë pronarët realë.
Pas këtij vendimi, kompania i kaloi në administrim Agjencisë së Administrimit të Pasurive të Sekuestruara dhe Konfiskuara, në Ministrinë e Brendshme.
Kjo nuk ishte tentativa e parë që aksionerët e kompanisë Integrated Energy kërkuan heqjen e sekuestros, pasi më herët kanë bërë kërkesë edhe në Gjykatën e Apelit, mirëpo dhe kjo e fundit la në fuqi sekuestron dhe administrimin shtetëror të kompanisë duke e konsideruar vendimin e shkallës së parë si të drejtë dhe të mbështetur në prova.
Kujtojmë se SPAK lëshoi opak kohë më parë 15 urdhër arreste për incenerartorin e Tiranës, por tek Bashkia shkoi deri në rang drejtorësh dhe kryebashkiaku Erion veliaj mbeti sërish i paprekur nga drejtësia.
